ایرانین ایسلام تبلیغات تشکیلاتینین مدنیت ایشلری اوزره باش دیرکتورو، آخوند احمد صحت قول اؤلکه قادینلارینین مجبوری حجابلا باغلی تطبیق ائدیلن قاداغا و محدودیتلره رعایت ائتمه‌مه‌سیندن، جمعیت‌ده حجابین گئتدیکجه آزالماسیندان گیلئیلنیب.

آخار. آذ خبر وئریر کی، آخوند ایران ایسلام رسپوبلیکاسیندا حجابین گوندن-گونه اؤز اهمیتینی ایتیردیینی دئیرک، بونون تهلوکه سیگنالی اولدوغونو بیلدیریب:

«اگر اؤلکه‌ده حجابا و اونون قایدالارینا نه قدر رعایت اولونوب-اولونماماسی ایله باغلی اکسپرتلرین حاضیرلادیغی حسابات و رقملره نظر سالساق، گؤرریک کی، اؤلکه‌نین ۱۰ ایالتی شریعت قایدالاری باخیمیندان واجیب ساییلان حجابلا علاقدار قویولان قیرمیزی خطی کئچیبلر.

لاکین همین ایالتلرده حجاب قایدالارینا رعایت اولونماسی نه قدر ضعیفله‌سه ده، پیک آنتنلری ایله وئریلیشلر یایان خاریجی شبکه‌لر و مختلیف ویرتوال عالم شبکه‌لری ایرانلیلارین عائله‌لرینه یول تاپسا دا، خوشبختلیکدن دئمک اولار کی، هله ده جمعیتیمیزده قادینلارین ۵۰ فایزی حجابلی‌دیر و اونلار شریعتین نظرده توتدوغو حجابا، چارشابا رعایت ائدیرلر. حساب ائدیره‌م کی، بونونلا فخر ائده بیلریک».

قید ائدک کی، سون گونلرده حاکمیتده تمثیل اولونان مختلیف روحانیلر، آخوندلار بیاناتلار یایاراق، اؤلکه‌ده حجابین گوندن-گونه ضعیفلمه‌سیندن نیگاران اولدوقلارینی بیلدیریبلر.