آلمانییانن لیتپروم موسسه‌سی («لیتپرم») آذربایجانلی یازیچی فریبا وفینی ۲۰۱۷-جی ایلین ان یاخشی خاریجی یازیچیسی مکافاتینا لاییق گؤروب.

کولت. آذ موسسه‌نین رسمی سایتینا ایستینادا خبر وئریر کی، ف.وفینین ۱۶ ایل اؤنجه قلمه آلدیغی «ترلان» رومانی منصیفلر هئیتینین ان چوخ سسینی قازاناراق بو مکافاتلا تلطیف ائدیلیب.

مکافات ۲۰۱۷-جی ایل اوکتیابرین ۱۱-دن ۱۵-دک فرانکفورت شهرینده کئچیریله‌جک دونیانین ان بؤیوک کیتاب سرگی‌سینده آذربایجانلی یازیچییا تقدیم اولوناجاق.

تانینمیش آذربایجانلی یازیچی مصاحیبه‌لرینین بیرینده تورکجه اثر یازماغین حسرتینده اولدوغونو و مجبوریت قارشیسین‌دا فارسجا یازدیغینی قید ائدیب.

ف.وفی ۱۹۶۲-جی ایلده تبریزده دوغولوب. او، ۱۱ جیلد قیسا حکایه و رومان کیتابینین مؤلفیدیر. یازیچینین «منیم قوشوم» و «تیبت رؤیاسی» اثرلری ایرانین بیر نئچه معتبر ادبی مکافاتینا لاییق گؤرولوب. آذربایجانلی یازیچینین بیر نئچه حکایه اثری ایتالیان، آنادولو تورکجه‌سی، آلمان، نوروژ، فرانسیز، روس، ایسوچ (سوئد)، عرب، ژاپن و اینگیلیس دیللرینه ترجمه اولونوب.

قید ائدک کی، لیتپرم غیری-حکومت تشکیلاتی‌دیر و آلمانییا دؤولتینین مالییه یاردیمی ایله فعالیت گؤستریر. موسسه آسییا، آفریکا و لاتین آمریکاسیندا نشر اولونان ان یاخشی اثرلری آلمان دیلینه چئویریر و آلمان اوخوجولاری سئچیلمیش اثرلرله تانیش ائدیر.