تبریزین ایران مجلیسین‌ده‌کی نماینده‌سی، میللت وکیلی علیرضا بیگی خودآفرین‌ده‌کی مئشه یانغینی ایله باغلی سوسیال شبکه‌ده اونا عنوانلانمیش سوالا جواب وئریب.

او، اینستاگرام ایستیفاده‌چی‌سی حسن آغازاده‌نین یانغین باش وئرن زامان پایتختین یولونو گؤزله‌مه‌لری ایله باغلی ایرادینا مناسیبت بیلدیریب:

«سیز میللت وکیلیسینیز، ایمکاناتین یارادیلماسینا چالیشاسینیز. کیچیک بیر یانغین باش وئرنده پایتختین یولونو گودورسوز»، - یازان آغازاده‌یه میللت وکیلی علیرضا بیگی «من اوستاندار اولدوغوم زامان یانغین سؤندورن جیهازلارین توپلوسونو، او جمله‌دن، هلکوپتر، خامئر ماشینی، ون و یانغین سؤندورن ماشینی آلینیب»، - جوابینی وئریب.

«لاکین من اوستانداری‌دن گئدن زامان بونلارین هامی‌سینی ساتدیلار. حتی منی خامئر ماشینی آلدیغیما گؤره تنقید ائدیردیلر»، - بیگی جوابین‌دا قئید ائدیب.
قئید ائدک کی، سؤزوگئدن مئشه یانغینی ورزیگانین سونگون میس معدنی یاخینلیغین‌دا خودآفرین شهریستانی‌نین خانقاه کندی اطرافین‌دا آرتیق ۵ گون‌دور کی، داوام ائدیر.