ایران پرزیدنتی سعودییه عربیستانینین نفت اوبیئکتلرینه ائدیلن هوجوملاری «یمن خالقینین قانونی مدافعه‌سی» آدلاندیریب و «اونلارین اؤلکه‌لرینین محو ائدیلمه‌سینه قارشی قانونی مدافعه‌یه صاحب اولدوقلارینی» وورغولاییب.

۱۶ سنتیابر، بازار ائرته‌سی گونو روسییا و تورکییه پرزیدنتلری ایله گؤروشو چرچیوه‌سین‌ده حسن روحانی «یمن خالقی بو قدر تجاووزه، هابئله آمریکا و آوروپادان سعودییه عربیستانی و اماراتا سلاح آخینینا جواب وئرمه‌یه مجبور اولدوغونو» قید ائدیب.

ایسلام رسپوبلیکاسی طرفین‌دن دستک‌لنه‌ن حوثی یاراق‌لیلاری اؤتن هفته‌نین شنبه گونو سحر ساعتلارین‌دا سعودییه عربیستانینین نفت اوبیکتلرینه ائتدیی هجوملارا گؤره مسئولیتی اؤز اوزرینه گؤتوره‌رک، هجوملارین ۱۰ عدد پیلوتسوز اوچوش آپاراتلاریندان ایستیفاده ائد‌رک حیاتا کئچیریلدیینی ادعا ائدیبلر.

بیر سیرا آمریکا رسمیلری، او جمله‌دن دؤولت کاتیبی مایک پومپئو ایسلام رسپوبلیکاسینا ایشاره ائد‌رک ایرانین هجوملاردا الینین اولماسین‌دان دانیشیبلار.

آمریکا پرزیدنتی دونالد ترامپ دا بازار ائرته‌سی گونو ایسلام رسپوبلیکاسینین هوجوملاردا الینین اولماسینی رد ائتمه‌سینه مناسیبت بیلدیریب: «اونلار آمریکانین پیلوتسوز طیاره‌سینین وورولماسی مسئله‌سینده ده «بؤیوک یالان» سؤیله‌دیلر.