ولادیمیر پوتین، آنکارا زیروه گؤروشونده، رجب طیب اردوغان و حسن روحانی‌نین حضوروندا، قرآنا استناد ائتمه‌سی ایله دونندن بری تورکیه‌ده و ایران‌دا ماراقلی تپکی‌لره باعث اولوبدور.

سؤزسوز، پوتین بیر سیاستچی اولاراق دونیا موسلمان‌لارینا باشچیلیق ائتمک ادعاسیندا بولونان ایران و تورکیه کیمی اؤلکه‌لرین جمهور باشقان‌لارینین یانیندا نئجه دانیشماغینی یاخشی بیلیر. پوتین قاباقجالار دا ایران رهبرینه بیر جیلد قرآن گؤندرمک‌له ثابت ائله‌میشدی کی سیاست دونیاسیندا قرآن‌دان نئجه فایدالانا بیلمه‌یینی یاخشی بیلیرمیش!

پوتین_ین اسلام دونیاسینا یاخین‌لاشماسی و حتی »اسلام کنفرانسی اؤرگوتو"-نه باش وورماسی و او قوروم‌لا ایش بیرلییی آپارماسی دا ائله سیاست دونیاسینین گرک‌لریندن اورتایا چیخیر.

آنجاق، پوتین-ین بو ایش‌لری روسیه کیمی زنگین بیر طنز و کمدی ادبیاتینا یییه‌له‌نن اؤلکه‌نین ملتینین باخیش‌لاریندان دا اوزاقدا قالمامیش: اونلارین فیکریجه روسیه‌نین تاریخینده ۳ بؤیوک "ولادیمیر" مذهب باخیمیندان ۳ فرقیلی دؤنم یاراتمیش‌لار. بونلارین ایلکی، پرنس ولادیمیر ایمیش کی میلاددان ۹۸۸ ایل سونرا مسیحیتی روسیه‌نین رسمی مذهبی اعلام ائتدی. ایکینجیسی ولادیمیر لنین ایمیش کی روسیه‌نین مذهبینی کمونیزمه چئویردی! اوچونجوسو ایسه ولادیمیر پوتین‌دیر کی روسیه‌نین مذهبینی اسلاما چئویره‌جک‌دیر!