ایران ایسرایل ایدمان‌چیلارینا قارشی آیری-سئچکی‌لییه سون قویاجاغینا سؤز وئریب.

بو سؤزلری بین الخالق اولیمپییا کمیته‌سینین رئیسی توماس باخ دئییب. او، ایرانین ایسرایل ایدمان‌چیلارینا قارشی آیری-سئچکی‌لیک سیاستینه سون قویاجاغینی وعد ائتدیینه دایر مکتوب گؤندردیینی آچیقلاییب.

کمیته رئیسینین سؤزلرینه گؤره، مکتوبو ایرانین ایدمان ناظری مسعود سلطانیفر و میللی اولیمپییا کمیته‌سینین ریسی رضا امیری صالحی ایمضالاییبلار.

قید ائدک کی، ایران حکومتی ایسرایلی رسمی دؤولت کیمی تانیمیر و ایران ایدمان‌چیلارینی موختلیف بهانه‌لرله بین الخالق یاریشلاردا ایسرایل رقیبلری ایله قارشیلاشماق‌دان ایمتینا ائتمه‌یه مجبور ائدیرلر.