ماراغا شهرین‌ده میللی فعال و دیرلی صنعت‌چی مریم خدایی سانازین دفن مراسیمی کئچیریلیب.

یانوارین ۲۲-ی گولشن زهرا قبیریستانلیغیندا میللی فعاللار و اهالینین ایشتیراکی ایله ویداعلاشما مراسیمی قورولوب.

خاطیرلاداق کی، مریم خدایی، حیات یولداشی بهراد تورمان ایله بیرلیکده ایللر اؤنجه تهران رژیمینین باسقیسیندان تورکییه‌ده سیاسی مهاجیر کیمی یاشاییردی. بو جوتلوک ۴ گون اؤنجه مرسین شهرین‌ده شخصی موتوسیکلتلری ایله گئدرکن قزایا اوغراییب. مریم خدایی حادثه یئرین‌ده دونیاسینی دییشیب. تورمان ایسه آغیر یارالانیب. او، حاضردا مرسین خسته‌خاناسین‌دا جراحییه عملیاتین‌دان سونرا نظارت‌ده ساخلانیلیر. حادثه سیاسی ماهیت داشیدیغی اوچون تورکییه پلیسی طرفین‌دن آراشدیریلیر و حادثه‌نی تؤره‌دن سوروجونون سورغوسو آپاریلیر.

قئید ائدک کی، تهران رژیمی بون‌دان اؤنجه ده، بیر نئچه سیاسی فعالی تورکییه و آذربایجان رسپوبلیکاسین‌دا تهدید ائدیب. بئله کی، تورکییه‌ده یاشایان سیاسی فعال مسعود مولوینین ایرانین تهلکه‌سیزلیک قوه‌لری طرفین‌دن اؤلدورولمه‌سی یاخین کئچمیش‌ده مطبوعات‌دا یاییلمیشدی.