اصفهان دوغورقانلیق و قیسیرلیق مرکزی‌نین اوزمانلاری و بیلیم آدام‌لاری‌نین چالیشمالاری نتیجه‌سینده ایکی کز فریز جنین‌دن 12 ایل‌دن سونرا یلک کؤرپه دونیایا گلدی.

خبرلره گؤره، اصفهان دوغورقانلیق و قیسیرلیق مرکزی‌نین اوزمان‌لاری و بیلیم آدام‌لاری‌نین چالیشمالاری نتیجه‌سینده اصفهان‌ین مهرگان خسته‌خاناسیندا ایکی کز فریز جنین‌دن 12 ایل‌دن سونرا ایلک کؤرپه دونیایا گلدی. بو کؤرپه‌نین آناسی 12 ایل اؤیجه آنا اولماق دیله‌یی ایله جنین‌لرینی فریز ائتمیشدی.

اصفهان دوغورقانلیق و قیسیرلیق مرکزی‌نین دوکتورو، اسدالله کلانتر بو خبری بیلدیره‌رک، دئدی: بیرینجی آشامادا، 1397 ایلینده یوکسک کیفیتی اولان دوندورولموش 3 جنین، فریزدن چیخاریلدیلار و ایکی جنین آنایا منتقل اولدو آنجاق دوغورقانلیقلا سونوجلانمادی.

سونرا آیری بیر جنین لابوراتوار محیطینده 3 گون بیلیمسل یؤنتم‌لرله ساخلاندیقدان سونرا بلاستوسیت (چوخ سلول‌لوق) آشاماسینا یئتیشدی و اویقون فرصت‌ده گلن حامیله‌لیق اوچون یئنه فریز اولوندو.

اصفهان دوغورقانلیق و قیسیرلیق مرکزی‌نین دوکتورو دئدی: کئچن ایل مرداد آییندا خسته یئنه مرکزه گلدی، رحمین حاضیر اولماغی اوچون درمان‌لار آلدی. شهریور آییندا دوبل فریز اولان جنین خسته‌یه منتقل اولدو و خوشبخت‌لیکله بو گون بو اوغلان اوشاغی دونیایا گلدی و آناسی 12 ایل گؤزله‌دیکدن سونرا کؤرپه سینی قوجاغینا آلدی.

بوندان اؤنجه ده اؤلکه‌میزین اوزمان‌لاری و بیلیم آدام‌لاری‌نین چالیشمالاری نتیجه‌سینده 14 ایل بویونجا فریز اولان جنین‌دن بیر اوشاق دونیایا گلیب. آما دوبل فریز یؤنتمی ایلک کز باشاری ایله اویغولانیب.

گونوموزده هر 10 قیسر (سونسوز) جیفت‌ین یئددیسی اوشاق صاحیبی اولاراق اومود گلیر یاشام‌لارینا، بو ایسه بیلیم آدام‌لاری‌نین یورولماز تلاشلاری سایه‌سینده گرچک‌لشیر.