ارمنیستان تهلوکه‌سیزلیک شوراسینین کاتیبی آرمن گریگوریان ایروانین روسیایا مالیه اؤد‌مسی مقابلینده سفاریش ائتدیی سلاحلاری آلا بیلمدیینی دئییب. بو باره‌ده ارمنیستان خارجی ایشلر ناظرینین معاونی مناتساکان سفریانین دا آچیقلاماسی وار. ناظر معاوینی سلاحلارین چاتدیریلمانین لنگیمسینین سببلری ایله باغلی سواللاری جوابلاندیرماییب.

Axar.az خبر وئریر کی، بو باره‌ده دیرلندیرمه آپاران پولیتولوگ ائلخان شاهین‌اوغلو مسئله‌نین قارانلیق طرفی اولدوغونو وورغولاییب.

«نیکول پاشینیان حاکمیته گلمه‌دن اول کئچمیش پرزیدنت سرژ سرکیسیان روسیادان ۲۰۰ میلیون دلار کردیت آلمیشدی و بو کردیت ائله روسیانین اؤزوندن حربی تکنیکا آلماق اوچون وئریلمیشدی. ارمنیستان حربی تکنیکانین آلیشی اوچون روسیایا پول اؤد‌یبسه، اوندا همین کردیتین تالعیی نئجه اولوب؟ روسیا ایکینجی قاراباغ محاربه‌سینین گئدیشینده مرکزی آسیا و ایرانین هوا ساحه‌سی اوزریندن ارمنیستانا کفایت قدر سلاح و سورسات گؤندردی کی، بو اؤلکه آذربایجانا مغلوب اولماسین. بس بو سلاح و سورساتین پولو نئجه اؤدنیب و یا اؤدنیب‌می؟» – اکسپرت بیلدیریب.

پولیتولوگ قید ائدیب کی، روسیا حاضردا اوکراینا باتاقلیغینین ایچریسینده اولدوغو حالدا اؤزونه سلاح و سورسات چاتدیرا بیلمیرسه، باشقاسینی تامین ائتمک اقتداریندا دئییل.