تورکیه گلوبال گوج اولما یولوندا سرعتلی آددیملار آتدیر. تورکیه قارداش آذربایجانلا قاراباغ‌دا چیین-چیینه دایانیر.

Axar.az خبر وئریر کی، بو سؤزلری تورکیه پرزیدنتی رجب طیب اردوغان آداناداکی واغزال میدانیندا کئچیریله‌ن میتینگده چیخیش ائدرکه‌ن دئییب.

«تورکیه خارجی سیاستده آوروپادان تعریفلر آلماق اوچون چالیشمیر، رگیونال گوج اولماقدان داها چوخ گلوبال گوج اولماق یولوندا سرعتلی آددیملار آتیر. بیز لیوییادا و قاراباغداییق. تورکیه قارداشلاری ایله ال-اله، چیین-چیینه دایانیر. خارجی سیاستده آرتان نفوذوموزون آرخاسیندا گوجلو مدافعه صنایع‌سی دایانیر. مدافعه صنایع‌سینده خارجی آسیلیلیغیمیز آزالدیقجا، خارجی سیاستده افکتیولییمیز آرتیر. بیز وظیفه‌یه گلنده ۸۰ فایز باشقالاریندان آسیلی ایدیک. خارجی سیاستده بیز آوروپادان «آفرین» آلماغا چالیشماقدان، بوتون دنیادا دوزگون و عقللی مؤوقعیی ایله تقدیر اولونان بیر اؤلکه‌یه چئوریلدیک»، - دئیه دولت باشچی‌سی وورغولاییب.

او، بیلدیریب کی، تورکیه مدافعه صنایع‌سی ساحه‌سینده سؤزون اصل معناسیندا داستان یازیر.

«بو گون تورکیه‌نین پوا-لاری ۳۴ مختلف اؤلکه‌نین سماسینی قورویور. بیز بو ساحه‌ده دنیانین ایلک اوچ اؤلکه‌سیندن بیرییک. گوجلو مدافعه صنایعمیزله دنیادا سؤز صاحیبییک. بو یاخینلاردا کاآن ایلک اوچوشونو اوغورلا حیاتا کئچیردی. دنیادا کاآن ایله ۵-جی نسل طیاره استحصال ائده بیله‌ن ۴ اؤلکه‌دن بیری اولدوق. بو غرور هامیمیزین، ۸۵ میلیونوموزوندور. ملت اولاراق ایناندیق، چالیشدیق و اللها شوکورلر اولسون، اوغور قازاندیق. بونلار یالنیز باشلانغیج ایدی. بیز داها چوخ، داها تکمیل ایشلر گؤرجییک. یئنی شاد خبریمیز یولدادیر. بیر دفعه بونو ائدجییک دئدیک، بیز بونو ائدیریک. ایچیمیزده‌کی مخالفلر، مانقورتلار آنلاماسا دا، دوستلاریمیز تورکیه‌نین نه قدر بؤیوک ایشلر گؤردویونو یاخشی بیلیرلر. سون دؤرد گوندور دنیا کاآن-دان دانیشیر»، - اردوغان علاوه ائدیب.