هجوم ائدیلن اوتاغین باییرا باخان دیوارلارینین، ائل‌جه ده تاوانینین پارتلاییش نتیجه‌سینده اوچماسینی گؤز اؤنونه آلدیقدا ضربه‌نین خاریجدن اولدوغونو، اوتاغین راکت و یا مرمی ایله هدف آلیندیغینی دئیه بیلریک. طبیعی کی، بوتون بونلار تکنیکی حساباتلاردا معیین‌لشه‌جک.

Axar.az خبر وئریر کی، بو سؤزلری حماس-ان ایرانداکی نماینده‌سی خالید قدومی آنادولو آگئنتلیینه آچیقلاماسیندا دئییب.

او بیلدیریب کی، ایران طرفی بو واختا کیمی هانییه‌نین نئجه اؤلدویونه دایر رسمی آچیقلاما وئرمه‌ییب:

«تکنیکی هئیت حقیقتلری اوزه چیخارماق اوچون گرگین شکیلده چالیشیر. هانییه‌نین قانی هله قوروماییب. دفنیندن اولدوقجا قیسا مدت کئچیب. اونا گؤره ده بو موضوعدا علمی حساباتین چیخماسی چوخ ائرکندیر. بیز ایرانداکی قارداشلاریمیزی گؤزله‌ییریک، گؤرک نه دئیه‌جک؟»

او، حادثه‌دن اؤنجه یاشانانلاری خاطیرلاییب:

«یئنی پرزیدنت مسعود پزشکیانین آندایچمه مراسیمیندن دؤندوک. هانییه و ایران پارلامئنتیندن مراسیمه قاتیلانلار آخشام یئمه‌یینه دعوتلی ایدی. هانییه داها سونرا تهرانا هر سفری زامانی تئز-تئز باش چکدیی اقامتگاهینا گئتدی. همین مکاندا باش ناظیرلر، خارجی ایشلر ناظرلری کیمی یوکسک سوییه‌لی رسمیلر قارشیلانیب. هانییه ۴-جو مرتبه‌ده قالیردی. او مرتبه‌ده باشقالاری دا وار ایدی. یعنی بو، ساده‌جه هانییه‌نی هدف آلان حادثه دئییلدی».

حماس نماینده‌سی نیویورک تایمسین اوتاغا اولجه‌دن بومبا یئرله‌شدیریلدیی ایله باغلی ادعالارینا دا مناسبت بیلدیریب:

«نیو یورک تایمس» مخبیری گؤره‌سن او بومبانی اؤزو یئرله‌شدیریب؟ یا اللرینده هدف آلینان مکانلا باغلی رسمی، شکیللی حساباتلار وار؟ بو منطیقسیز آچیقلامانین هئچ بیر علمی اساسی یوخدور. هانییه کئچمیش ایران پرزیدنتی ابراهیم رئیسی اؤلدویو زامان دا عینی یئرده قوناق ائدیلیب. سو-قصد نیه اوندا دئییل، ایندی حیاتا کئچیریلدی؟ آمریکادان یاشیل ایشیق ایندی گلدیی اوچون، یا همین واخت اونو اؤلدورمه‌مه‌یه دقت ائتدیکلری اوچون؟»