خارجی اؤلکه‌لرده یاشایان گونئی آذربایجاندان اولان میللی فعاللار قاراباغدا حیاتا کئچیریله‌ن آنتی‌ترور تدبیرلرینی دستکلییرلر.

Axar.az خبر وئریر کی، بو باره‌ده گونئی‌لی سویداشلاریمیزین یایدیقلاری بیاناتدا بیلدیریلیب.

میللی فعاللارین بیاناتیندا وورغولانیب کی، قاراباغ بؤلگه‌سینده قانونسوز یئرلشدیریلن ارمنیستان حربی بیرلشمه‌لری سون زمانلار تخریبات فعالیتلرینی گئنیشلندیریب، مینالاردان تمیزلنن اراضیلرده پارتلاییجی واسطه‌لر یئرلشدیریبلر.

بیاناتدا قید اولونوب کی، ارمنی قولدور دسته‌لرینین خوجاوند رایونوندا باسدیردیقلاری مینالارین پارتلاماسی نتیجه‌سینده سنتیابر آیینین ۱۹-دا بیر نئچه نفر هلاک اولوب. عینی گونده داخلی ایشلر ناظیرلیینین امکداشلارینی داشییان ماشینین مینایا دوشمه‌سی نتیجه‌سینده بیر نئچه پلیس امکداشی هلاک اولوب، خسارت آلانلار اولوب:

"آذربایجان دولتینین ده دفعه‌لرله بیان ائتدیی کیمی، ارمنیستان سلاح‌لی قوه‌لرینین قاراباغ بؤلگه‌سینده‌کی وارلیغی ۱۰ نویابر ۲۰۲۰-جی ایل تاریخینده امضالانان اوچطرفلی بیاناتین ماده‌لرینه ضددیر، بؤلگه‌ده صلح و امین-آمانلیق اوچون جدی تهلوکه یارادیب.

شبهه‌سیز کی، اوچطرفلی بیاناتین حیاتا کئچیریلمه‌سی قاراباغ‌دا تؤره‌دیلن گئنیش کاراکترلی تخریباتلارین قارشی‌سینین آلینماسینا و ارمنیستان سلاح‌لی قوه‌لرینه باغلی بیرلیکلرین سلاحسیزلاشدیریلاراق اراضی‌دن چیخاریلماسینا سبب اولاجاق. عینی زماندا قاراباغا قاییدان دینج اهالینین، اورادا چالیشان ایشچیلرین و حربی قوللوقچولارین تهلوکه‌سیزلیینین تامین اولونماسی، سرحدلرین توخونولمازلیغینی، بؤلگه‌ده صلح و امین-آمانلیغین یارانماسینی تامین ائد‌جک".

"میللی فعاللار اولاراق، ارمنیستانی اوچطرفلی بیاناتا صادق قالماغا، بو دولته باغلی بوتون سلاح‌لی بیرلیکلرین آذربایجان تورپاقلارینی ترک ائتمه‌سینی طلب ائدیریک. دنیا بیرلیینی ایسه آذربایجانا قارشی ارمنی تخریباتلارینی قیناماغا، آذربایجان اهالی‌سینین تهلوکه‌سیزلیینی قوروماغا، بؤلگه‌ده باریشین قورونماسی اوچون چالیشان سویداشلاریمیزی مدافعه ائتمه‌یه چاغیریریق. بیر داها بو حاقلی مجادله‌ده آذربایجان دولتینین و خالقینین یانیندا اولدوغوموزو، الیمیزدن گلن هر جور یاردیمی و دستیی اسیرگمیه‌جییمیزی بیلدیریر، مظفر اردوموزا اوغورلار دیلییریک"، - بیاناتدا قید اولونوب.