آذربایجان رسپوبلیکاسینین خارجی ایشلر ناظیری جیحون بایراموو اؤلکه‌میزه رسمی سفری چرچیوه‌سینده تورکیه رسپوبلیکاسینین خارجی ایشلر ناظیری هاکان فیدانین رهبرلیک ائتدیی نماینده هیئتی ایله گؤروشوب.

Axar.az خبر وئریر کی، ناظیرلر آراسیندا کئچیریلن تک‌به‌تک گؤروش داها سونرا هر ایکی طرفین نماینده هیئتلرینین اشتراکی ایله گئنیش ترکیبده داوام ائدیب.

گئنیش‌ترکیبلی گؤروشده ایکی اؤلکه آراسیندا ایکی‌طرفلی، رگیونال و چوخ‌طرفلی امکداشلیق گوندلیینین پرسپکتیولری، بؤلگه‌ده‌کی جاری وضعیت، هابئله اشغالدان آزاد ائدیلمیش اراضیلرده آپاریلان برپا قوروجولوق ایشلری اطرافیندا فکر مبادله‌سی آپاریلیب.

گؤروشده ۲۰۲۳-جو ایلده آذربایجاندا اولو اؤندر حیدر علیئوین ۱۰۰ ایللیک یوبیلئیینین، قارداش تورکیه‌ده ایسه جمهوریتین ۱۰۰ ایللیک یوبیلئیینین قید ائدیلمه‌سی فونوندا ایکی اؤلکه آراسیندا بوتون سویه‌لرده تماسلاریمیزین داها اینتنسیو، داها محصولدار کاراکتر آلدیغی وورغولانیب.

چوخ‌شاخه‌لی و زنگین آذربایجان-تورکیه استراتژی متفقلیک گوندلیینین جاری وضعیتیندن ممنونلوق ایفاده ائدیلیب، سیاسی، اقتصادی، تجارت، حربی، مدافعه صنایع‌سی، انرژی تهلوکه‌سیزلیی، اینوستیسییالار، هومانیتار، تحصیل، مدنیت و دیگر ساحه‌لر اوزره مناسبتلرین تاریخی یوکسلیش مرحله‌سینده اولدوغو بیلدیریله‌رک شوشا بیاننامه‌سینین بو خصوصدا مهم زمین اولدوغو قید اولونوب.

هابئله، بین‌الخالق و رگیونال تشکیلاتلار چرچیوه‌سینده قارشی‌لیقلی فایدالی طرفداشلیغین نمونه‌وی کاراکتر داشیدیغی دقته چاتدیریلیب. چوخ‌طرفلی پلاتفورمالاردا، او جمله‌دن بیرلشمیش ملتلر تشکیلاتی و اونون تاسیساتلاری، تورک دولتلری تشکیلاتی، اسلام امکداشلیق تشکیلاتی، مرکزی آسییا اؤلکه‌لری ایله اوچ‌طرفلی و دؤردطرفلی فورماتلار چرچیوه‌سینده بیرگه تدبیرلرین اینتنسیولیینین آرتیریلماسینین، یئنی چوخ‌طرفلی تشببوسلرین ایر‌لی سورولمه‌سینین اهمیتیندن سؤز آچیلیب.

ناظیرلر همچینین بؤلگه‌میزده ثابتلیین قورونماسیندا آذربایجان-تورکیه متفقلیک مناسبتلرینین واجب رولونا توخونوب، آذربایجانین اراضی بوتؤولویونون و سووئرنلیینین تام برپاسی ایله بو گون بؤلگه‌ده تاریخی مقامین یاراندیغینی، دولتلرین سووئرنلیی و اراضی بوتؤولویونون قارشی‌لیقلی تانینماسینین و بو کیمی تمل پرینسیپلره حرمتله یاناشیلماسینین بؤلگه‌ده‌کی داواملی صلح، ثابت‌لیک و فراوانلیغا آپاران یگانه یول اولدوغونو بیر داها بیان ائدیبلر.

گؤروشده ناظیر جیحون بایراموو همکارینی آذربایجانین اشغالدان آزاد ائدیلمیش اراضیلرینده آپاریلان گئنیش‌مقیاسلی برپا و قوروجولوق ایشلری، ارمنیستانین ۳۰ ایللیک اشغالی نتیجه‌سینده قاچقین و مجبوری کؤچکون وضعیتینه دوشموش وطنداشلاریمیزین گئری قاییدیش پروسسی، هابئله آذربایجان ارمنیستان آراسیندا اعتماد قوروجولوغو استقامتینده آتیلان سون آددیملار باره‌ده معلوماتلاندیریب.

ناظیر جیحیون بایراموو اشغالدان آزاد ائدیلمیش اراضیلرده فعالیتلرینده تورکیه طرفینین آکتیو اشتراکینی یوکسک قیمتلندیریلدیینی وورغولاییب.

گؤروشده همچینین قارشی‌لیقلی ماراق دوغوران دیگر ایکی‌طرفلی، رگیونال و بین‌الخالق مسئله‌لر اطرافیندا فکر مبادله‌سی آپاریلیب.

داها سونرا ناظیرلرین اشتراکی ایله کئچیریلمیش مطبوعات بریفینگینده گؤروشون نتیجه‌لرینه دایر بیاناتلار سسلندیریلیب، ژورنالیستلرین سواللاری جوابلاندیریلیب.