ایران خاریجی ایشلر ناظری عبداللهیان ارمنیستانا تبریزده کونسولوق آچیلماسینین تکلیف ائدیلدیینی و بونون راضیلاشدیریلدیغینی بیلدیریب. بو، البته کی، تبریزده نورمال قارشیلانا بیلمز.

بو سؤزلری Axar.az-آ میللی دیرنیش تشکیلاتینین سؤزچوسو مجید جوادی دئییب.

او بیلدیریب کی، بو، اصلینده قوزئی‌دن داها چوخ، گونئی آذربایجانا بیر مئساژدیر:

«حتی بیزی تحقیر ائتمک و آشاغیلاماقدیر. سون آیلار میللی حرکاتدا جانلانما مشاهده ائدیریک، بو سبب‌دن ایران گونئی آذربایجانا تبریزده سؤز حاقینین کیمده اولدوغونو گؤسترمک ایستییر. طبیعی کی، تبریز بونا راضی دئییل و بونون نتیجه‌لرینی تئز بیر زامان‌دا گؤرجییک. ایستر سیاسی قوروملار، ایستر خالقیمیز بونا رئاکسییا وئره‌جک».

گونئی آذربایجان جمهوریت پارتییاسینین مئدیا تمثیلچیسی باریش بوزقورد ایسه ایرانین ایللردیر یوروتدویو آنتی‌آذربایجان سیاستینه توخونوب:

«تبریزده ارمنیستان کونسوللوغونون آچیلماسی قراری بو تخریباتلارین نؤبتی نمونه‌سیدیر. اؤزونو شیعه و مسلمان آدلاندیرماسینا باخمایاراق، ایکینجی قاراباغ محاربه‌سینده ده آذربایجانین دئییل، ارمنیستانین یانین‌دا اولدو. بو، گونئی آذربایجان‌دا ناراحاتلیق یاراتدی. ایرانین بئله سیاستینه قارشی گونئی‌لیلر کوچه‌لره چیخیب، اؤز اعتراضینی بیلدیردی. ایندی ده ایرانین آتدیغی سون آددیم ایستر خالق، ایسترسه ده سوسیال مئدیادا کسکین اعتراض یارادیب. گونئی آذربایجانین سیاسی تشکیلاتی اولاراق بئله بیر ایشین اولماسینا قارشیییق. بونا وار گوجوموزله اعتراضیمیزی بیلدیریریک. چونکی بوتون ایران اراضی‌سینده اولان ارمنیلرین سایی ۲۰-۲۵ مین آراسیندادیر. بو رقملرین اؤزو ده شبهه‌لیدیر. اولا بیلسین کی، داها آزدیر. شرقی آذربایجان‌دا یاشایان ارمنی اهالی‌سینین دقیق سایینا ایسه راست گله بیلمدیم. ارمنیلر، اساساً تهران و اصفهان‌دا یاشاییر. شرقی آذربایجان‌دا ایسه سایلاری او قدر دئییل کی، تبریزده اونلار اوچون کونسوللوق یارادیلسین. بیز یاخشی باشا دوشوروک کی، بو سیاست آذربایجانین بوتؤولویونه قارشیدیر. بونا ایسه تعجبلنمیریک، ایرانین عنعنوی سیاستی همیشه بو جور اولوب. بو آددیم، عینی زامان‌دا میللی حرکاتا قارشی پسیخولوژی تضییق‌دیر. بونونلا دا بیزه قارشی ساواش آچدیغینی گؤستریر».