ارمنیستان پارلامنتینین صدری آلن سیمونیان آذربایجان و ارمنیستان خارجی ایشلر ناظیرلرینین برلینده صاباح کئچیرجکلری گؤروشو ایرلیلییش کیمی قیمتلندیریب. سیمونیان آذربایجان و تورکیه ایله صلح شرایطینده یاشاماغین علیه‌اینه اولمادیغینی دا سؤزلرینه علاوه ائدیب. گؤرونور، آلن سیمونیان بو یوللا سون زمانلار ایکی اؤلکه آراسیندا آرتان گرگینلیی آزالتماق ایسته‌ییب.

Axar.az خبر وئریر کی، بو باره‌ده پولیتولوق ائلخان شاهین‌اوغلو قید ائدیب.

او بیلدیریب کی، بو کیمی آچیقلامالار اورتامی یومشالتمایاجاق:

«رئال آددیملارا احتیاج وار. باش ناظیر نیکول پاشینیان پارتییاسینین ملت وکیللری ایله کئچیردیی قاپالی توپلانتی‌دا آذربایجان پرزیدنتی ایلهام علیئوله مونحن گؤروشونده نتیجه الده ائدیلمدیینی بیلدیریب. اصلینده مونحن گؤروشو مثبت نتیجه‌یه حسابلانمامیشدی، همین مذاکره گرگینلیی آزالتماغا هدفلنمیشدی. آنجاق پاشینیانین مونحندن درحال سونرا پاریسه چاغیریلماسی و فرانسادان آلاجاغی یئنی حربی تکنیکا، اوسته‌گل سرحدده آتشکسین پوزولماسی حاللارینین آرتماسی آلمانییاداکی مذاکره‌لری هئچه ائندیردی. بو دفعه ده بئله اولاجاق، خارجی ایشلر ناظیرلرینین گؤروشوندن سونرا فرانسا-ارمنیستان جوتلویونون نؤوبتی تخریبات‌چی آددیمی هر شیین اوستوندن خط چکه‌جک».

قید ائدک کی، آذربایجان و ارمنیستان خارجی ایشلر ناظیرلرینین آلمانییادا گؤروشو ۲۸-۲۹ فورال تاریخلرینده اولاجاق. جیحون بایراموو آرتیق آلمانییایا یولا دوشوب.