اسرائیلین ایرانین راکت هجومونا جاواب اولاراق بو اؤلکه‌نین ۳ ایالتینده ۲۰ حربی اوبیئکت و حربی تعیناتلی تاسیساتلارا هاوا هجوملاری باشا چاتدی.

اسرائیلین هجوملارینین باشا چاتدیغینی اعلان ائتمه‌سی ایله عینی واختدا ایران مئدیاسی دا هجومون بیتدیینی بیلدیره‌ن معلوماتلار یاییب.

ایران رهبرلییندن هئچ کیم هله‌لیک هجوملا باغلی جدی تهدید بیاناتی یایماییب، بوندان اوولکیلردن فرقلی اولاراق اسرائیله قارشی تهدید مئساژلاری سسلندیرمه‌ییبلر.

آمریکا رسمیلری ایسه تل-آویودن ایراناهجوملارین محدود اولماسینی طلب ائتدیکلرینی و اسرائیلین بونو یئرینه یئتیردیینی بیلدیریرلر.

بونونلا یاناشی واشنگتن ایرانا مراجعت ائد‌رک مناقیشه‌نی یئنیدن قیزیشدیرماماماغا و اسرائیله هجوم ائتمه‌مه‌یه چاغیریب.

رسمی تهرانین و دولت مئدیاسینین ایسه هجوملا باغلی نماییش ائتدیردیی مؤقع یئنیدن جاواب ضربه‌سینین اولمایاجاغینا دلالت ائدیر.

بونونلادا اسرائیل-ایران آراسیندا اولان مناقیشه‌نین قربانلارینین یئنه ده فلسطینلی و لیوانلیلار اولاجاغی آیدین اولور.

اسرائیلین ایرانین حربی و حربی تعییناتلی مرکزلرینه بو گونکو هجومونون ووردوغو خسارت و تلفات باره‌ده هله‌لیک دقیق ملوماتلار یاییلماسا دا، آمریکانین ده بیلدیردیی کیمی ضربه‌لرین تل-آویوین بوندان اول وعد ائتدیی سوییه‌ده اولمادیغی گؤرونور.

هجومون ایلک ساعتلاریندا ایسرائیل رسمیلری هدفلر آراسیندا نووه اوبیئکتلری و نفت یاتاقلاری و نفت ائمالی زاوودلارینین اولمادیغینی بیلدیردیلر.

بو ایسه تل-آویو و تهرانین آمریکا واسطه‌سیله هجوملار باره‌ده راضیلیغیا گلدیکلری باردکی ادعالارین حقیقت اولدوغونو گؤستریر.

چوخ گومان کی، اسرائیل حماس و حیزبللاه-آ قارشی عملیاتلارینی داوام ائتدیره‌جک، فلسطینلی و لیوانلیلار ایسه تهران حاکمیتینین سیاسی-ایدئولوژیک ماراقلاری و بو رژیمین مؤوجودلوغونون قورونوب ساخلانیلماسی اوغروندا داها چوخ قوربانلار وئره‌جکلر.

ایران حاکیمیتین ایسه اؤلدورولن فلسطینلی و لیوانلیلارا گؤره یاس مراسیملری کئچیره‌رک ایدئولوژی تبلیغاتینی گوجلندیرمک‌ده، مسلمانلارین بیر حیصه‌سینین حیسسیاتیندان سو-استفاده ائتمه‌یه داوام ائد‌جک.

بونا گؤره ده، فلسطینلی و لیوانلیلارین وضعیتدن چیخیش یوللاری رسمی بیروت و مستقیل فلسطین دؤولتی‌نین باشچیسی محمود عباسین ایرانین مداخیه‌سینی رد ائد‌ن منطیقلی سیاستلرینی قبول ائتمکدیر.

رسمی بیروت و محمود عباسین مناقیشه‌نین حلی له باغلی سیاستلرینی ایسه بوتون عرب دنیاسی و غرب اؤلکه‌لری دستکله‌ییر.

ایران ایسه بونا قارشی چیخماق، گرگینلیین داوام ائتمه‌سینه چالیشماقلا اصلینده دولایی یوللا اسرائیلین فلسطینلی و لیوانلیلارا قارشی عمللرینه براعت قازاندیریر.

اونودا قید ائتمک لازیمدیر کی، بوتون ادعالارا باخمایاراق، ۴۵ ایلدیر اولدوغو کیمی آمریکا ملا حاکمیتینین دییشدیریلمه‌سینده هله ده ماراقلی دئییل.

تهرانین عمللریندن واشنگتن بؤلگه اؤلکه‌لری ایله علاقه‌لرین‌ده حربی، سیاسی و خصوصاً اقتصادی ساحه‌ده ماکسیموم استفاده ائدیر.