آرتیق بیرمعنالی اولان اودور کی، آذربایجان طیاره‌سینی روسیا حربی قوه‌لری ووروب. هئچ شبهه‌سیز کی، بو باره‌ده ولادیمیر پوتینه معروضه اولونوب. آنجاق ندنسه او، باش وئرمیش بو اولایدا روسیانین رولونو اعتراف ائتمه‌یه تلسمیر.

Axar.az خبر وئریر کی، بو سؤزلری آوروپادا یاشایان ژورنالیست ائلبیی حسنلی باکی-گروزنی اوچوشونو حیاتا کئچیرن آزال-آ مخصوص طیاره‌نین آکتاودا قضایا اوغراماسی حاقدا قید ائدیب.

او بیلدیریب کی، ملکی طیاره‌نین سهوا وورولماسینی باشا دوشور:

«آنجاق روسیانین وورولموش ملکی طیاره‌یه عاجیل ائنیش ائتمه‌یه اجازه وئرمه‌مه‌سی، اوسته‌لیک، خزر دنیزینده جنایتین ایزینین ایتمه‌سی امیدی ایله مقصدلی شکلده طیاره‌نی قازاخیستانا یؤنلتمه‌سی آرتیق جنایت عملی‌دیر. بونون مسئولیتی تام فرقلیدیر. یعنی روسیا سهوا ووردوغو طیاره‌ده‌کی ملکی انسانلاری اؤز برباد ایمیجینی قوروماق مقصدی ایله بیله‌رکدن اؤلومه گؤندریب. ان پیس اولانی بودور!

روسیانین تؤرتدیی داها دهشتلی طیاره قضالاری وار. بو اولای همین قضالاری یئنیدن گون‌ده‌مه گتیرجک. چونکی روسیا هئچ بیر قضایا گؤره مسئولیتی اؤز اوزرینه گؤتورمه‌ییب. اونو دا دئییم کی، بو اولایدان سونرا روسیانین بین‌الخالق سوییه‌ده تجرید اولونماسی داها دا درینلشه‌جک. روسیایا قارشی توتال تبلیغات داها دا گوجلنه‌جک.

روسیا چتین وضعیته دوشوب. حقیقتی اعتراف ائده بیلمیرلر. سوسماق دا روسیانین علیه‌اینه ایشلییر».