لاچین‌دا آذربایجان رسپوبلیکاسینین پرزیدنتی ایلهام علیئوین، تورکییه رسپوبلیکاسینین پرزیدنتی رجب طاییب اردوغانین و پاکستان اسلام رسپوبلیکاسینین باش ناظری محمد شاهباز شریفین زیروه گؤروشو کئچیریلدی.

Axar.az خبر وئریر کی، دولتیمیزین باش‌چیسی زیروه گؤروشون‌ده چیخیش ائتدی.

پرزیدئنت ایلهام علیئوین چیخیشی

-حؤرمت‌لی تورکییه پرئزیدئنتی، عزیز قارداشیم رجب تایییب اردوغان.
حورمتلی پاکستان باش ناظری، عزیز قارداشیم محمد شاهباز شریف.
عزیز دوستلار.
آذربایجانا، شرقی زنگزورا، لاچینا خوش گلمیسینیز.

بوگونکو زیروه گؤروشو آذربایجانین مستقل‌لیک گونون‌ده، ارمنی اشغالیندان آزاد ائدیلمیش لاچین‌دا کئچیریلیر. بونون بؤیوک رمزی معناسی وار. بوگونکو زیروه گؤروشو سایجا ایکینجی‌دیر. کئچن ایلین ایولوندا آذربایجان-تورکییه-پاکستان بیرینجی زیروه گؤروشو کئچیریلمیش‌دیر. امینم کی، بیز بو عنعنه‌نی داوام ائتدیرجه‌ییک.

اؤلکه‌لریمیز و خالقلاریمیز بیرگه تاریخ، مدنیت و دیرلر اساسیندا بیر-بیرینه باغلی‌دیر. بیر-بیریمیزین اوغورلارینا سئوینمیشیک، چتین گونلرده بیر-بیریمیزین یانین‌دا اولموشوق.
آذربایجان، تورکییه و پاکستان هر زامان سووئرئنلیک، اراضی بوتؤولویو و عدالتین طرفینده اولوب. ۲۰۲۰-جی ایلده ۴۴ گونلوک وطن محاربه‌سینین ایلک گونلرین‌دن اعتباراً تورکییه و پاکستانین اؤلکه‌میزه گؤستردیی سیاسی و معنوی دسته‌یه گؤره بیر داها مینتدارلیغیمیزی بیلدیریریک. آذربایجان دا اؤز نوبه‌سینده دایم تورکییه‌نین و پاکستانین یانیندا اولوب. بو گون بیز بیر داها خالقلاریمیزین بیرلیینی تصدیقله‌ییریک.

اؤلکه‌لریمیزین استراتژی موقعیین‌دن و دینامیک اقتصادی پتنسیالیمیزدان استفاده ائتمکله قارشیلیقلی فایدالار الده ائتمک اوچون گئنیش امکانلار وار.

سیاست، اقتصادیات، انرژی، قارشیلیقلی اینوستیسییالار، نقلیات، مدافعه، کند تصروفاتی، اینفورماسییا تکنولوژییالاری و دیگر ساحه‌لرده امکداشلیغین بیرگه لاییحه‌لر و پروگراملار واسطه‌سیله داها بؤیوک سرعتله انکشاف ائده‌جه‌یینه اینانیریق.

آذربایجان تورکییه اقتصادیاتینا ۲۰ میلیارد آمریکا دوللاریندان چوخ سرمایه قویوب، پاکستان اقتصادیاتینا ۲ میلیارد آمریکا دوللاری قویماغا حاضردیر. حال-حاضردا کنکرت اینوئستیسییا لاییحه‌لری اوزره ایشلر گئدیر.

آذربایجان و تورکییه‌نین امکداشلیغی نتیجه‌سینده یالنیز بؤلگه‌میزین دئییل، گئنیش جغرافییانین انرژی خریطه‌سی دییشیب. اؤلکه‌لریمیز انرژی تهلکسیزلیینین تامین اولونماسیندا اهمیتلی رولا مالک اولوب و بو گون برپااولونان انرژینین استحصالی و اخراجی استقامتینده گئنیش لاییحه‌لره استارت وئریلیب. بونونلا یاناشی، آذربایجان و تورکییه‌دن کئچمکله آسیا ایله آوروپانی بیرلشدیره‌ن نقلیات یوللاری استراتژی اهمیت داشیییر. مولتیمودال یوک مارشروتونون انکشافی یولو ایله پاکستانین دا بو تشبوثده یاخیندان اشتراکینین امکداشلیغیمیزا داها دا تکان وئره‌جیینه امینیک.

مدافعه ساحه‌سین‌ده امکداشلیق طرفداشلیغیمیزین اؤنملی استقامتلریندن بیریدیر. بیرگه حربی تعلیملر و حربی-تکنیکی ساحه‌ده لاییحه‌لر سلاحلی قوه‌لریمیزین پتنسیالینی گوجلندیریب. بیزیم حربی امکداشلیغیمیز گئنیش جغرافییادا صلحو و ثابتلییی گوجلندیریر.

بیز، همچینین رقمسال ایننوواسییالار، صنعی اینتللکت و کوسمیک تکنولوژییالار کیمی یئنی امکداشلیق ساحه‌لرینی آراشدیرمالیییق.

بیرگه مدنی تدبیرلر، آکادمیک طرفداشلیقلار و توریزم علاقه‌لرینین فعاللاشماسی خالقلاریمیز آراسینداکی باغلاری داها دا گوجله‌ندیره‌جک‌دیر.

عینی زامان‌دا، بین‌الخالق پلاتفورمالاردا و تشکیلاتلاردا همرایلییمیز گوجوموزه گوج قاتیر. بیرلشمیش میللتلر تشکیلاتی، اسلام امکداشلیق تشکیلاتی، اقتصادی امکداشلیق تشکیلاتی، آسیادا قارشیلیقلی فعالیت و اعتماد تدبیرلری اوزره مشاوره، هابئله د-۸ کیمی بین‌الخالق پلاتفورمالاردا بیرگه سعیلریمیزی داها دا محکه‌مله‌ندیرمک عزمیندییک.

همچینین اؤلکه‌میزین اؤتن ایل د-۸-ین ۱۱-جی زیروه گؤروشو زامانی یکدیللیکله بو تشکیلاتین عضوو سئچیلمه‌سین‌ده گؤستریلن دسته‌یه گؤره قارداش تورکییه‌یه و قارداش پاکستانا بیر داها تشکر ائدیره‌م.

حورمتلی همکارلار،
آذربایجان هر زامان قارداش تورکییه و پاکستانین یانیندا اولوب.
تورکییه‌نین ترورچولوقلا مبارزه استقامتینده الده ائتدیی اوغورلار بیزی اورکدن سئویندیریر. پ‌ک‌ک ترور گروپلاشماسینین اؤزونو لغو ائتمه‌سی و ترک سلاح ایله باغلی قراری تورکییه پرزیدنتی رجب طاییب اردوغانین لیدرلیینین و عزمینین، تورکییه دولتینین گوجونون نمونه‌سی‌دیر. بو تاریخی حادثه یالنیز تورکییه اوچون دئییل، عمومیلیک‌ده بؤلگه‌ده صلح و امین-آمانلیق اوچون اؤنملی مسئله‌دیر. بو تاریخی حادثه مناسبتیله قارداش تورکییه‌نی بیر داها تبریک ائدیره‌م.

پاکستان و هندستان آراسن‌دا سون گرگینلییی بؤیوک ناراحاتلیق حسی ایله، ائلجه ده صلح و ثابیتلیین برپا اولوناجاغی امیدی ایله یاخن‌دان ایزله‌دیک. بو گرگین دؤنم‌ده ایلک گوندن پاکستانلا همرایلییمیزی آچیق شکیلده ایفاده ائتدیک. مناقیشه‌نین دیالوگ و صلح یولو ایله، بین‌الخالق حقوقون نورما و پرینسیپلرینه، ب‌م‌ت تهلکه‌سیزلیک شوراسینین قطعنامه‌لرینه اساسلانان حلینی دستکله‌ییریک.

عزیز دوستلار، ۳۰ ایللیک ارمنستان اشغالیندان سونرا دیرچه‌لیش دؤورونو یاشایان لاچینا بیر داها خوش گلمیسینیز.
امینم کی، آذربایجان-تورکییه دوستلوغو، قارداشلیغی ابدی اولاجاق.

دقتینیزه گؤره تشکر ائدیره‌م.

سونرا تورکییه پرزیدنتی رجب طاییب اردوغان و پاکستانین باش ناظری محمد شاهباز شریف چیخیش ائتدیلر.