بلژیک پارلامنتینین خاریجی سیاست کمیته‌سی ایران سفیرینی حبس‌ده اولان آذربایجان اصیللی ایران-ایسوئچ وطنداشی اولان تدقیقاتچی احمدرضا جلالینین وضعیتی ایله باغلی ایضاحات وئرمک اوچون پارلامنته چاغیریب.

Axar.az خبر وئریر کی، بو حاقدا جلالینین حیات یولداشی ویدا مهران‌نیا معلومات یاییب.

«پارلامنت و کومیته رهبرلری بیلدیریبلر کی، اوچ آی سسسیزلیک‌دن، عالیمین هارادا ساخلانیلماسی باره‌ده معلومات‌سیزلیقدان سونرا احمدرضا جلالی ایله باغلی ناراحاتلیقلار همیشه‌کیندن داها چوخ آرتیب»،- او بیلدیریب.

خاطیرلاداق کی، اسرائیل حربی هاوا قوه‌لری ایونون ۲۳-ده تهرانین اوین حبسخاناسینا ضربه ائندیردیک‌دن سونرا احمدرضا جلالی و چوخ سایدا باشقا محبوس دیگر حبسخانالارا کؤچورولوب. او گوندن بو یانا آذربایجان‌لی عالیمین هارادا ساخلانیلماسی و ساغلیق دورومو ایله معلومات الده ائتمک ممکن اولماییب.

قید ائدک کی، اصلن گونئی آذربایجانین ساراب ماحالیندان اولان ایسوئچ وطنداشی احمدرضا جلالی ۲۰۱۶-جی ایلین آپرئل آیین‌دا تهران و شیراز اونیورسیته‌لرینین دعوتی ایله علمی کنفرانسا قاتیلماق اوچون ایرانا سفر ائتدیکدن سونرا حبس ائدیلیب.

۲۰۱۷-جی ایلین سنتیابر آییندا تئران انقیلاب محکمه‌سی آذربایجانلی عالیمی «اسرائیله جاسوسلوق» اتهامینا گؤره اعداما محکوم ائدیب و قرار ایران عالی محکمه‌سی طرفین‌دن ده تصدیق اولونوب.