روسیا ایله آذربایجان آراسینداکی مناسبتلرده ثابتلیک، شفاف‌لیق و دوستلوق بوتون ام.د.ب و آوراسیا تهلوکه‌سیزلییی اوچون واجیب‌دیر. ولادیمیر پوتین و الهام علیئو آراسین‌دا دوشنبه‌ده کئچیریلن گؤروشدن سونرا مناسبتلر یاخشیلاشیر و مرکب مسئله‌لرین حلی اوچون قارشی‌لیقلی آددیملار آتیلیر. پوتین و علیئوین دوشنبه گؤروشو لیدرلر آراسیندا شخصی مناسبتلرین و اونلارین صمیمی تماسلارینین بوتون مرکب مسئله‌لرین حلینین آچاری اولدوغونو نمایش ائتدیردی.

Axar.az خبر وئریر کی، بونو روسیالی پولیتولوگ یوگنی میخایلوو دئییب.

«روسیا آنلاییر کی، آذربایجان جدی رگیونال اویونچودور و اونون امکداشلیغی اولمادان رگیوندا تام ثابت‌لیک و تهلوکه‌سیزلیک اولا بیلمز. روسیا ایله آذربایجانین اورتاق جهتلری چوخدور. روسیادا بؤیوک بیر آذربایجان دیاسپورو وار، آذربایجاندا ایسه یاخشی اینتگراسیا اولونموش بؤیوک بیر روس اجماسی وار و اونون اؤز عادت-عنعنه‌لرینی و دینینی قورویوب ساخلاماسی اوچون هر جور شرایط یارادیلیب. روسیا و آذربایجان قونشودور. بیزی خزر دنیزی بیرلشدیریر. شمال-جنوب بین‌الخالق نقلیات دهلیزی ده داخل اولماقلا، گئنیش‌مقیاس‌لی ایستراتژی لایحه‌لر حیاتا کئچیریریک و انرژی سکتورون‌دا امکداشلیق ائدیریک. امکداشلیق پوتنسیالیمیز دا گئنیش‌دیر. بو گون آذربایجان تورک دنیاسیندا مهم رول اویناییر و هم قفقازدا، هم ده اورتا آسیادا حرمتله قارشی‌لانیر. اوسته‌لیک، گؤروروک کی، بو گون آذربایجان و ارمنستان آراسیندا صلحون برقرار اولماسی اوچون دانیشیقلار کفایت قدر اوغورلا گئدیر. جنوبی قفقازدا صلحون برقرار اولماسی روسیا اوچون واجیبدیر. «۳+۳» رگیونال امکداشلیق فورماتینین (اوچ جنوبی قفقاز رسپوبلیکاسی و اونلارین اوچ بؤیوک قونشوسو - روسیا، ترکیه و ایران) بؤیوک پوتنسیالی وار. طبیعی کی، بو فورماتدا قارشیلیقلی علاقه بوتون اشتراکچیلار اوچون بؤیوک امکانلار آچاجاق. آذربایجان و ارمنستان ماللارین ترانزیتی اوچون اراضیلرینی قارشی‌لیقلی اولاراق بیر-بیرینین اوزونه آچیب، او جمله‌دن رسمی باکی روسیا ماللارینین ارمنستانا ترانزیتینه راضی‌لیق وئریب. بو، هم ده امکداشلیغیمیزداکی مثبت تندنسیالاری گؤستریر»، - او بیلدیریب.