اردبیل حبسخاناسین‌دا غیری-معین وضعیت‌ده ساخلانیلان ملی فعاللار علی واثقی، عسگر اکبرزاده و سیامک میرزایی‌نین باره‌لرینده چیخاریلان ۱ آیلیق قطع‌امکان قراری باشا چاتیب.

Axar.az خبر وئریر کی، بو حاقدا آدی چکیلن محبوسلارین عائله‌سینه یاخین منبع‌لر بیلدیریبلر.

اونلارین سؤزلرینه گؤره، بونا باخمایاراق، فعاللار سبب‌سیز حبس‌ده ساخلانیلیر و باره‌لرینده ایر‌لی سورولن اتهاملار دا اعلان ائدیلمیر.

"فعاللارین محکمه‌یه قدر سربست بوراخیلمالارینا گؤره گیروو قویولماسی اوچون انضیباطی آددیملاری تاماملاماق مقصدیله اردبیل دولت و انقلاب پروکورورلوغونون ۱۰-جو استنطاق شعبه‌سینه گئتدیک. آنجاق ایش اوزره مستنطق حسن کریمی حبس قرارینین گیروو قرارینا چئوریلمه‌سینه راضی اولمادی و ایشین هله پروکورورلوغا گؤندریلمه‌دیینی بیلدیردی"،- محبوسلارین یاخینلاری بیلدیریب.

اونلارین سؤزلرینه گؤره، ایش اوزره مستنطق همچینین بیلدیریب کی، کشفیات ایداره‌سی و محکمه ایشچیلری راضی‌لیقلارینی بیلدیره‌نه قدر فعاللارین گیروو قارشیلیغیندا سربست بوراخیلماسی ممکن اولمایاجاق.

مستنطق بون‌دان اول ایسه عائله‌لره بیر آیلیق حبس مدتی بیتدیک‌دن و گیروو قویولدوق‌دان سونرا محبوسلارین موقتی آزادلیغا بوراخیلما احتیمالینین تامین ائدیلجه‌یینی بیلدیرمیشدی.

منبع همچینین قید ائدیب کی، سیامک میرزایی، عسگر اکبرزاده و علی واثقی عائله‌لری ایله قیسا تلفن دانیشیغیندا حبسخانادا ساخلانیلما شرایطلرینین آغیر اولدوغونو بیلدیریبلر.

قید ائدک کی، ایونون ۲۸-ده سیامک میرزایی خیاودا (مشگین)، عسگر اکبرزاده و علی واثقی ایسه اردبیل‌ده حبس ائدیلیب.

هر اوچ فعال بوندان اول ده دینج مدنی فعالیتلرینه گؤره ساخلانیلیبلار.