اورمییانین ایسلاماباد محله‌سینده رادیکال کورد دسته‌لرینه منصوب اولدوغو احتیمال ائدیله‌ن شخصلر داها ایکی مکتبه هوجوم ائدیب.

آخار. آذ خبر وئریر کی، بو باره‌ده اورمییه پروکورورو مصطفی حبیبی معلومات یاییب. او بیلدیریب کی، هوجوم ائد‌ن شخصلردن بعضیلری ساخلانیلیب:

«ایسلاماباد منطقه‌سینده یئرلشن مکتبین اؤنونده والدینلرین توپلاشدیغی باره‌ده معلومات آلدیق. بودان سونرا من و بیر سیرا دیگر مسئوللار حادثه یئرینه گئتدیک. بیز شاگیردلرین والدینلرینی صبیرلی اولماغا چاغیردیق، بو ایشین قانونی یوللا حل ائدیلجیینی بیلدیردیک. بودان سونرا همین والدینلر و اونلارا دستک وئرن اطرافداکی اینسانلار ساکیتلشرک داغیلیشدیلار. لاکین بو آرادا بعضیلری اهالینی تحریک ائتمه‌یه چالیشدی، حتی اونلاردان بیر نئچه‌سی تهلوکه‌سیزلیک قوه‌لری طرفیندن ساخلانیلدی».

پروکورور قید ائدیب کی، اهالینین اعتراضینا سبب اولان مکتب گؤزتچی‌سی ده محکمه حکمو ایله ساخلانیلیب.

قید ائدک کی، بوندان اول اوکتیابرین ۲۳-نه کئچه‌ن گئجه اورمییانین ایسلاماباد محله‌سینده قیز مکتبی یئرلی اهالینین هوجومونا معروض قالیب. بونا سبب کیمی مکتب گؤزتچیسینین قیز شاگیرده قارشی اخلاقسیز حرکته جهدی گؤستریلیب.

غربی آذربایجان والیسینین تهلوکه‌سیزلیک و سیاسی مسئله‌لر اوزره معاوینی علیرضا رادفر قیز شاگیردین مکتبین گؤزتچی‌سی طرفیندن اخلاقسیز حرکتلره معروض قالماسی خبرینین حقیقتی عکس ائتدیرمدیینی بیلدیریب.