تانینمیش تبریزلی شاعر و ایش آدامی محمد چالغین روسییانین پایتختی موسکوا شهرینده‌دیر.

جنوبلو سویداشیمیز کولت. آذ-آ موصاحیبه‌سینده روسییایا سفری حاقدا ماراقلی فاکتی آچیقلاییب.

- قیشین اوغلان چاغی عرفه‌سین‌ده سویوق موسکوایا سفرین سببی ندیر؟

- سفریمین اساس سببی ۲۰۱۸-جی ایلده روسییادا کئچیریله‌جک فوتبول اوزره دونیا چئمپیوناتی یاریشماسینا حاضرلانان خالینین لاییحه صدری اولماغیمدیر. حاضیرلادیغیمیز خالی دونیانین موزئیلرینده اولان خالیلار قدر قیمتلیدیر. اینشاللاه، ساتیلار، پولونا احتیاجیمیز وار، ساتیلماز، کرئملین، یا دا روسییا فدراسییاسینین هانسیسا موزئیینه هدییه ائدریک.

- روسییا، خصوصیله موسکوا جنوبلو شاعرین گؤزونه نئجه گؤرونور، یادداشینا نئجه هوپور؟

- موسکوادا حرکت وار، عصیان وار، سانکی. حیات چوخ قایناردیر. عجب ده سئویله‌سی شهردیر. موسکوانی شعیر کیمی گؤروره‌م. موسکوانی اوخویورام سانکی. بلکه ده مایاکووسکینین، یا ناظیم حیکمتین روحو دوشونوب کی، جنوبلو بیر شاعر گلیب، بو شیمال شهرینین سویوغوندا قیزینسین.

- سنین بعضی شعیرلرین‌ده تفکورون محصولو بوی وئریر، یعنی یاشانتیلارین‌دان چوخ دوشونجه‌لرین اولور شئیرلرین‌ده. سنجه، روسییادا قیسا مدتده اولماغین اوبرازلاریندا هر هانسی دییشیکلیکلر ائد‌جکمی؟

- موسکوادا ایکینجی دفعه‌دیر اولورام. ایلک دفعه بورادا چوخ قالا بیلمدیم. ایندی شهری گزدیک‌ده حیس ائتدیم کی، منه موثبت انرژی باغیشلادی، بورانی شاعرلر شهری کیمی حس ائتدیم و سئودیم. امینم کی، ایچیمده یئنه ده یئنیلیکلر اولاجاق. زیرا، بیر شاعری هئچ بیر کیتاب ائتدیی سفر کیمی ساوادلاندیرماز. من گزدیکجه اؤیره‌نیرم.

- تبریزلی شاعر موسکوادا یاشایا بیلرمی؟

- آنام چوخ داریخار مندن اؤترو. آنام داریخماسایدی، دئمیرم همیشه‌لیک، اما ان آزی ۱ ایل موسکوادا یاشایاردیم. موسکوادان دویماق اولمور کی.

- «قریبلیک، قریبلیک، آمان غریبلیک/چؤکوبدور سینه‌مه اوجا داغ کیمی»، - یازمیسان. ۳-۴ گونه غریبلیک تأثیر ائدیرسه، ۱ ایل نئجه قالاجاقسان؟

- هئچ یئر وطن اولا بیلمز. وطنین بیر قاریش یئرینی دونیایا دییشمک اولماز. گزمه‌یه غربت اؤلکه..، - دئییبلر. وطن اوچون داریخیرام.