مرند شرقی آذربایجان اوستانینین ایری شهرلریندن بیریدیر.

کولت. آذ خبر وئریر کی، شرقی آذربایجانین شیمالیندا یئرلشن شهر جنوب‌دان تبریز، شیمال‌دان زونوز، علمدار، غرب‌دن خوی و ماکو ایله، شرقدن ایسه اهر شهری (قاراداغ محلی) ایله همسرحددیر. سون سیاهییا آلما گؤستریر کی، بورادا یاشایان آذربایجانلیلارین سایی ۱۳۰ مین-دیر و بو گؤستریجییه گؤره او، یالنیز تبریز و ماراغادان گئری قالیر. ۱۴۰۰ کوادرات کیلومتر (کیلو متر مربع) اراضی‌سی اولان مرندین ۲/۳ حیصه‌سی غیری-هاماردیر. دنیز سوییه‌سین‌دن ۱۳۰۰-۱۴۰۰ مئتر یوکسکلیک‌ده اولان مرندین تبریزله آراسینداکی مسافه ۷۱ کیلو متر، جولفا (نمر) ایله ایسه ۶۰ کیلومتر-دیر. تبریز-جولفا دمیر یولو و تبریزدن آوروپایا گئدن و بیر چوخ ترانزیت یوللار بورادان کئچیر.

مرند شهری هر طرفدن بؤیوکلو کیچیکلی داغ سیلسیله‌لری احاطه اولونوب بو داغلار ایچری‌سینده میشوو داغی اؤز جغرافی مؤوقعیی، زنگینلیگی و طبیعتینین رنگارنگلیگی ایله فرقلنیر. مرندله اورمو گؤلو و شبستر آراسیندا یئرلشن بو داغین باشی ایلین بوتون فصیللری قار ایله اؤرتولو اولور.تبریزدن جولفایا و آوروپایا گئدن یوللار میشوو داغین اتییندن کئچیر. میشوو داغینین اتیینده یئرلشن یام یایلاغی اؤز صاف سویو و هاواسی ایله دیللر ازبریدیر.

مرندین اراضی‌سینی احاطه ائد‌ن باشلیجا چایلاری سئللی سو، زیلبیر، زنوز چای، سینیخ چای، قره چای و علمدار چایلاریدیر. بو اراضی معالیجوی بولاقلارلا دا زنگیندیر. منبعینی میشوو داغیندان آلان بی سویو مینرال ماده‌لرینه و معالیجوی اهمیتینه گؤره داها قیمتلیدیر. مرندده هاوانین هحرارتی یایدا ۳۸ درجه‌دن (داغ اتیین‌ده ۱۰ درجه‌دن) یوخاری قالخمیر. اهالی‌سینه گؤره تبریز و ماراغادان سونرا ۳ جو شهردیر. اراضی‌سینه گؤره ایسه تبریز ، ماراغا و میانادان سونرا ۴ جو شهردیر.