بلدییه رسمی‌لری حیوانلارین سیغیناجاقلاردا ساخلانیلدیغینی بیلدیریر.

آذنیوز. تی وی خبر وئریر کی، تبریزده نئچه ایلدیر کوچه ایتلری جانلی اولاراق توپلانیب ساخلانیلیردی. آنجاق سون گونلرده یاغچیان شهرجیین‌ده گئجه ساعتلارین‌دا بو حیوانلارین اینجیدیلمه‌سی و گولله‌له‌نمه‌سی سسلری ائشیدیلیر. گولله سسی گجه‌نین سون ساعتلارین‌دا ائشیدیلیر و بیر چوخ محله ساکینلری بوندان ناراحات‌لیق کئچیریر، بئله کی، گولله‌له‌نن حیوانلارین سسی ساعتلارلا ائشیدیلیر. بو حاللارین داوام ائتمه‌سی حیوان‌سئور قوروملارین دا اعتراضینا سبب اولور. بوندان علاوه، گئجه ساعتلارین‌دا ائشیدیله‌ن سسلر اوشاقلار، قادینلار و محله ساکینلرینی ده قورخودور.

بونو محله ساکینلری ده تصدیقله‌ییر، آنجاق بلدییه رسمی‌لری دئییر:
بلدییه‌ده کوچه ایتلری‌نین اؤلدورولمه‌سی حاللاری عمومیتله یوخدور و تبریز بلدییه‌سی سیغیناجاقلا (کوچه ایتلرینی قورویان بیر مرکز) موقاویله باغلایاراق حیوانلارین جانلی توتوب ساخلانیلماسینی بو مرکزه تاپشیریب و بو موقاویله ۴ ایلدیر کی ایجرا اولونور و حیوانلارین ساخلانما خرجلری ده بلدییه طرفین‌دن اؤدنیلیر.