چایین سو آخینینین آزالماسی سببی ایله بالیقلار طلب اولوب.

بو سؤزلری شرقی آذربایجان اطراف موحیط ایداره‌سینین سؤزچوسو داوود قاسیم‌زاده هوراندین دره چای بالیقلارینین تلف اولماسی ایله باغلی یاییلان شکیل و ویدئولارا مناسیبت بیلدیررکه‌ن دئییب. اونون سؤزلرینه گؤره، بالیقلار اؤتن هفته تلف اولوب.

«چایین سو آخینینین آزالماسی ایله حادثه باش وئریب. اکین‌چیلرین حددن آرتیق چای سویون‌دان ایستیفاده ائتمه‌لری بو حادثه‌نین باش وئرمه‌سینین عامللریندن‌دیر. اؤتن گونلرده مسئله ایله باغلی علاقه‌لی اورقانلارین تعقیبی ایله چای سولاری یئنی‌دن چوخالیب. ائل‌جه ده سون گونلرین یاغینتیلاری چای سولارینین چوخالماسینا سبب اولوب. حال-حاضردا بالیقلارین تلف اولماسی ایله باغلی هئچ بیر گزارش(راپور) وئریلمه‌ییب»، – بیلدیریب.

قاسیم‌زاده بالیقلارین تلف اولماسینا چایین اوزرین‌ده قورولان سددین آچیلماسی ایله هئچ بیر علاقه‌سی اولمادیغینی وورغولاییب.

قید ائدک کی، بو مسئله‌ین بیرباشا مسئولو اولان محیط زیست ایداره‌سی بالیقلارین تلف اولماسین‌دا چایین سو حاقی اولان سددن بوراخیلماماسی ایله هئچ بیر علاقه‌سی اولمادیغینی بیلدیرسه ده، چایدا یاشایان بیر چوخ جانلینین تلف اولماسی چایین سو حاقینی بوراخیلماسی ایله علاقداردیر. همچینین، حادثه‌نین باش وئرمه‌سین‌ده موحیط زیست ایداره‌سینین خبری اولماماسی دا بو ایداره‌نین دویارلیلیغینین ان یاخشی گؤستریجی‌سی‌دیر. قاراداغ شهرلرین‌دن اولان هراند شهری تبریزین ۱۵۰ کیلومترلیین‌ده یئرلشیر.