تبریزین باغمئشه شهرکین‌ده تورپاق سوروشمه‌سی داوام ائدیر.

بو سؤزلری شرقی آذربایجان بحران مدیری محمد تقی هنربر ایرنا-یا مصاحیبه‌سین‌ده دئییب. او، باغمئشه‌یه یاغان یاغیشلارین تورپاغین ضعیفله‌مه‌سینه و سوروشمه‌سینه سبب اولدوغونو، بو سبب‌دن طبیعت حادثه‌سینین داوام ائتدیینی بیلدیریب.

«پلیس ایندی اراضینی تمامیله بوشالدیب. اینسانلارا داواملی اولاراق خبردارلیقلار وئریلمک‌ده‌دیر»، – هنربر سؤزلرینه علاوه ائدیب.

قید ائدک کی، بو شهرک و قونشو روشدییه و ولی امر کیمی شهرکلرین اینشاسینا باشلاناندان، تخمیناً، ۳۰ ایل اؤنجه موتخصصلر، مهندیسلر و مئدیا بو ساحه‌ده یئرلشن یاشاییش منطقه‌لرینین تهلوکه‌لی اولدوغو باره‌ده دفعه‌لرله آچیقلامالار وئرمیش‌دیلار. لاکین تورپاق ساتیجیلاری و بعضی قوروملارین مدیرلری وطنداشلارین حیاتینی، گله‌جک‌ده یارانا بیله‌جک تهلوکه‌لری نظره آلمایاراق گلیرلیلیینی آرتیرماق اوچون بو اراضی‌ده ائو ساتماغا و تیکمه‌یه جهد ائتدیلر. تأسف کی، زلزله‌یه معروض قالان اراضی‌ده ایندی ۲۰۰ مین‌دن چوخ اینسان یاشاییر. باغمئشه شهرکی تبریزین شیمالین‌دا زلزله‌یه مئیللی اراضی‌ده، غرب‌دن شرقه اعینالی آدلانان یوکسک داغلارین یاماجلاریندا یئرلشیر.