اورمودا امامزاده یولون‌دا ۳ ماشینین زنجیرواری توققوشماسی نتیجه‌سین‌ده یول قزاسی باش وئریب.

بو باره‌ده غربی آذربایجان بحران ایداره ائتمه مرکزینین رئیسی باقر بهرامی معلومات یاییب.

قزا نتیجه‌سین‌ده ۲ نفر حادثه یئرین‌ده‌جه حیاتینی ایتیریب، ۳ نفر ایسه یارالانیب. یارالیلاردان ایکی‌سی خسته خانایا چاتدیریلیب، بیری ایسه معایینه‌دن سونرا ائوه بوراخیلیب. حادثه‌یه حددن آرتیق سرعت سبب اولوب.

باشقا یول قزاسی ایسه قاراداغین ورزیقان شهرین‌ده باش وئریب. حادثه نتیجه‌سین‌ده ۱ نفر اؤلوب، ۱ نفر یارالانیب.

اولای ایله باغلی شرقی آذربایجان اورژانس( فؤوق العاده) سؤزچوسو وحید شادی معلومات وئریب. اونون سؤزلرینه گؤره، حادثه ورزقانین چیخیش یولون‌دا «پیکان» ماشینینین موتورسیکلتله توقوشماسی نتیجه‌سین‌ده میدانا گلیب.

قزادا ۱۷ یاش‌لی موتورسیکلئت سوروجوسو حیاتینی ایتیریب. یارالی ورزقانین علامه امینی خسته خاناسینا کؤچورولوب.