ایران‌دا باهالیغا اعتراض اولاراق کئچیریله‌ن اعتراض آکسییالاری زامانی یوخا چیخان گونئی آذربایجان‌لی رئژیسورون جان‌سیز بدنی هشترودون (سرسکند) ۳۰ کیلومئترلیین‌ده یئرلشن سهند بندینده تاپیلیب.

آخار. آذ خبر وئریر کی، هشترودلو ۲۵ یاش‌لی رئژیسور اکبر کریمی اصلین جسدی اوزرین‌ده ایشگه‌نجه ایزلیی آشکار ائدیلیب.

گنج رژیسور نویابرین ۱۷-ده تبریزه سفر ائتمک مقصدی ایله ائوده‌ن چیخیب، سونرا اونونلا باغلی هئچ بیر خبر اولماییب.

اکبر کریمی اصل بیر نئچه قیسامئتراژلی فیلم چکیب. مدنیت و اینجه‌صنعت ساحه‌سین‌ده فعالیت گؤسترن گنج رژیسور تورک دیلین‌ده کورسلار دا تشکیل ائدیب.

مرحومون عائله‌سی اونون ساخلاندیغینی دوشونه‌رک تهلوکه‌سیزلیک قوه‌لرینه بیر نئچه دفعه مراجعت ائدیبلر. لاکین رژیسورون جانسیز بدنی یوخا چیخدیق‌دان ایکی هفته سونرا دکابرین ۲-ده سهند بندین‌ده تاپیلیب. حکومت رسمیلری اونون سو بندینده بوغولدوغونو بیلدیریب. لاکین مرحومون اوز ناحییه‌سین‌ده اولان ایشگه‌نجه ایزلری مسئوللارین ادعاسینین یالان اولدوغونو ثبوت ائدیر. همچینین سویوق هاوا شرایطین‌ده کیمسه‌نین سودا چیممه‌سی و یا بالیق توتماغا گئتمه‌سی فاکتی دا ایناندیریجی دئییل.