تحصیل ایداره‌سینین اعلانی ایله علاقدار اردبیل استانینین بوتون مکتبلری دکابرین ۶-دان تعطیل ائدیر.

مکتبلرین تعطیل‌ده اولماسینا هاوالارین سویوماسی و «آنفولانزا» ویروسونون یاییلماسی سبب کیمی گؤستریلیر.

بون‌دان سویوق هاوالاردا مکتبلرین تعطیل‌ده اولماماسی گؤستریله‌ن سببله باغلی شوبهه دوغوروب.

صحییه ناظرینین معاوینی علیرضا رئیسی دکابرین ۷-ی «آنفولانزا» ویروسون‌دان ال‌نلرین سایینین ۸۱ نفره چاتدیغینی بیلدیریب.

اؤن هفته بو خسته‌لیک‌دن اؤلنلرین ۲۵ نفر اولدوغو قید اولونوردو. بیر هفته عرضین‌ده ۵۶ نفر رسمی ایستاتیستیکالارا اساساً حیاتینی ایتیریب.

قید ائدک کی، نویابرین ۳۰-دان دکابرین ۷-ا قدر ۸ ۳۳۳ نفر بو خسته‌لیک سببی ایله خسته‌خانالارا مراجعت ائدیبلر. بونا باخمایاراق، رسمیلر دفعه‌لرله آچیقلامالاریندا لازیمی قدر واکسینین اولدوغونو بیلدیریبلر.

بو باره‌ده اردبیلین طب اونیورسیتتینین معاوینی محمدرضا رضایی نویابرین ۳۰-دا دئییب:

«ایندییه کیمی آنفولانزا ویروسو ایله باغلی ۱۰۰ نفر ساغلام‌لیق مرکزلرینه مراجیه ائدیب کی، بونلاردان ۳-او حیاتینی ایتیریب».

تبریزین طب اونیورسیتتینین معاوینی روزبه رجیی شرقی آذربایجان‌دا ۱۰ نفرین اؤلدویونو بیلدیریب. آنجاق بو خسته‌لییه نئچه نفرین یولوخماسی باره‌ده هئچ بیر معلومات وئرمه‌ییب.

زنجان طب اونیورسیتتینین رئیسی پرویز قیزیلباش دکابرین ایکی‌سی اوستان‌دا ۳ نفرین اؤلدویونو بیلدیریب.

غربی آذربایجانین طب اونیورسیتتینین معاوینی رسول انتظار مهدی ده اوستان‌دا ۳ نفرین اؤلدویونو بیلدیریب.