دونن ایران تلویزیونونون «دستپخت» پراگرامیندا، میهن کرخاناسی‌نین گله‌نکسل پنیرینی تبلیغ ائتمک اوچون، تبریزین «لیقوان پنیری»-نه قارشی اولومسوز تبلیغات اولوندو. بو ایش بیر چوخ اعتراض‌لارا سبب اولدو.

«میهن شرکتی» مجموعه لری، ۱۳۵۴ گونش ایلینده «پایداری قارداشلار» طرفیندن تهران اوستانی‌نین اسلام‌شهر شهرینده قورولدو.
میهن بستنی و لبنیات کرخاناسی‌نین صاحبی ایوب پایداری، شرقی آذربایجان‌دا شبسترین صوفیانیندا آنادان اولوب. او، تهرانا گئدندن سونرا ایشینه رونق وئره رک، ۱۰ مین نفره ایش یارادیب.

بللی دییل بو آذربایجانلی ایش یارادان خلاق اینسان اؤز گله‌نکسل پنیرینی ایران تلویزیونونون بیرینجی شبکه سینده تبلیغ ائله‌مک اوچون نیه آذربایجانین آدلیم پنیر برندی اولان لیقوان پنیرینی کورلاماغا و پیس‌لمه‌یه اوز گتیریب. یا دا دستپخت پروگرامی‌نین سونوجوسو یا عوامیلی میهن شرکتی‌نین بیلگیسی اولمادان بو چیرکین ادبیات ایله لیقوان پنیرینی پیس‌له‌ییبلر.

هر حالدا جماعات میهن شیرکتی‌نین آچیقلاماسینی و صداو سیمانین پروگرام سونوجوسو واسیطه‌سی‌یله رسمی عذر دیلمه‌سینی گؤزلورلر.