تورک فعال میثم جولانی داها اول غیابی اولاراق محاکیمه ائدیلدیی محکمه‌نین چیخاردیغی ۶ آی حبس و ۷۴ شلاق حکمونه اعتراض ائتمیش‌دی. فعالین اعتراضی قبول اولونوب، محکمه ایجلاسی یئنی‌دن تشکیل ائدیلدی، لاکین اردبیل محکمه‌سی حبس حکمونو ۶ آیدان ۱۳ آیا آرتیردی.

آخار. آذ خبر وئریر کی، اردبیل جزا محکمه‌سینین ۱۰۲-جی شعبه‌سینین چیخاردیغی یئنی حکمه گؤره، سیاسی فعال «عمومی اینتظامی پوزماق» اتهامی ایله ۱۳ آی حبس و ۷۴ شلاق جزاسینا محکوم ائدیلیب.

یئنی حکمون صورتی سوسیال مئدیا و هرا آگنتلیینین وئب صحیفه‌سین‌ده یاییلیب.

میثم جولانی ۲۰۱۹-جو ایلین نویابر آیین‌دا ایرانین موختلیف ویلایتلرین‌ده کئچیریلن کوتلوی اعتراضلارلا علاقدار توتولموشدو. او، بیر مدت نظارت آلتین‌دا قالدیق‌دان سونرا مولکی ضمانت قارشیلیغین‌دا سربست بوراخیلدی.