ایران رژیمی اؤز آداملارینی اونیورسیتتلرده طلبه اولاراق اوللر ده یئرلشدیریب. قبول امتحانلاری زمانی مطلق بیر شکلده سپاه، «بسیج»، اطلاعات-دان اولان گنجلره ده عالی مکتبلرده اوخوماق اوچون شرایط یارادیب.

بو سؤزلری Axar.az-آ آذربایجان اؤیرنجی حرکاتینین سؤزچوسو امیر مردانی ایران اونیورسیتتلرینده «حشدالشعبی» ترور گروپونون عضولرینین تحصیل آلماسی ایله باغلی خبرلره مناسبت بیلدیررکن دئییب.

او بیلدیریب کی، دولتین اساس مقصدی اونلارا عالی تحصیل وئرمک دئییل:

«رژیم تحصیل اوجاقلاریندا آیریجا بؤلمه‌لر یاراداراق، لازم بیلدیی طلبه‌لری بو یئرلره قبول ائتدیریب. بونون مختلف سببلری وار. هم گلجک کادرلارینی یئتیشدیریر، هم ده اونلاری اؤز آداملاری اولاراق ایشله تامین ائدیر، عینی زماندا اونیورسیتتلرده باشلایان اعتراضلاری اونلار واسطه‌سی ایله نظارتده ساخلاییر. بئله کی، هر هانسی بیر سببدن تحصیل اوجاقلاریندا ناراضیلیق یاراندیقدا آداملاری اورتایا چیخیر، قارشی‌دورما یارادیر و ائله تقدیم ائدیرلر کی، آکسیا ایکی گروپ طلبه آراسیندا باش وئریب، باشقا سیاسی سببی یوخدور. بونونلا دا ایرانین ماشاسی اولان طلبه‌لر دیگرلرینی باسقییا معروض قویماقلا اعتراضلارا سون وئریردی».

مردانینین سؤزلرینه گؤره، «حشدالشعبی» گروپونون عضولری اوچون ده بئله بیر شرایطین یارادیلماسی رژیمین تدبیرلی داورانماسیندان قایناقلانیر:

«حشدالشعبی» حربی و بعضی اؤلکه‌لرده ترور کیمی قبول ائدیلن گروپلاشمادیر. ایندی بو گروپون عضولرینین طلبه کیمی اونیوریستتلره یئرلشدیریلمه‌سی گؤستریر کی، رژیم گلجک آکسیالارا حاضرلاشیر. اونیورسیتتده اولان آداملارینی ایسه یئترلی بیلمیر. ترورچولاری ایرانا گتیرمک اوچون قانونی یول فکرلشیب. بو جور انسانلاری تحصیل آدی آلتیندا اؤلکه‌ده یئرلشدیریر. بونونلا دا همین شخصلر واسطه‌سی ایله نه‌اینکی اونیورسیتتلرده، حتی ایرانین باشقا شهرلرینده ده باش وئرجک اعتراضلاری یاتیرماقدا اونلارین گوجوندن استفاده ائتمک نیتینی آچیق اورتایا قویور».