بو گون ایران‌دا کئچیریلن ۱۲-جی چاغیریش پارلامنت و ۶-جی چاغیریش اکسپرتلر مجلیسینین سئچکیلرینده غربی آذربایجان ایالتینین اورمییا و سولدوز (نقده) شهرلرینده سئچیجی آکتیولیینین یوکسک اولاجاغی گؤزلنیلیر.

Axar.az خبر وئریر کی، بونا سبب حکومتین بو دفعه ده آذربایجان شهرلرینده تورک و کورد نامیزدلر آراسیندا رقابتی قیزیشدیرماق پلانینین باش توتماسی‌دیر.

هر ایکی طرفدن اولان نامیزدلر و اونلاری دستکله‌یه‌ن گروپلار، باشقا طرفین نامیزدلرینین غالیب گلمه‌مه‌سی اوچون چاغیریشلار ائدیب، باشقا شهرلردن گروپلار حالین‌دا اورمییا و سولدوزا سئچیجیلر گتیریرلر.

یئرلی سوسیال مئدیا فعاللارینین وئردیی معلوماتا گؤره، سحر ساعتلاریندان باشلایاراق، سویوقبولاق، بوکان، اوشنو و باشقا بیر نئچه بؤلگه‌دن اورمییا و سولدوزا کورد سئچیجیلرین آخینی باشلاییب.

بونونلا یاناشی، خاریج و داخیلده فعالیت گؤسترن بیر نئچه گونئی‌لی فعال و قورومدا اوخشار چاغیریشلار ائد‌رک، آذربایجانا قارشی اراضی ادعاسی ائد‌ن کورد نامیزدلرینین سئچیلمه‌مه‌سی اوچون آذربایجانلیلاری غربی آذربایجان ایالتینده کئچیریلن سئچکیلرده فعال اولماغا چاغیریبلار.

بو قبیلدن اولان چاغیریشلاردان بیری گونئی آذربایجان میللی اویانیش حرکاتینین (گاموح) آمریکادا یاشایان باشچی‌سی محمودعلی چهرگانی طرفین‌دن سسلندیریلیب.

او، کورد نامیزدلرین سئچیلمه‌مه‌سی اوچون آذربایجان‌لیلاری حتی سپاه عضولرینه بئله سس وئرمه‌یه دعوت ائدیب.

کئچمیش سیاسی محبوس و ملی فعال عباس لیسانی ده اوخشار بیاناتلا چیخیش ائدیب، تورکلری آذربایجانا قارشی اراضی ادعاسی ائد‌ن کورد نامیزدلرین مغلوبیتی اوچون "اورمو بیرلیک سسی" کوالیسییاسینین تکلیف ائتدیی ۳ تورک نامیزده سس وئرمه‌یه چاغیریب.

قید ائدک کی، بوندان اول بیر گروپ غربی آذربایجان‌لی ضیالی، طلبه، میللی فعال‌دان عبارت اولان "اورمو بیرلیک سسی" کوالی‌سییاسی اورمییادان اولان تورک نامیزدلر روح‌اللاه حضرتپور، سید سلمان زاکیر و حسین حاجی نبی‌نی دستکله‌مه‌یه چاغیریب.

۴ میلیون اهالی‌سی اولان غربی آذربایجان ایالتینده، تخمیناً، ۲۰ فایز کورددور.