سوریادان بوتون ایران‌لیلارین تخلیه‌سی حکومتین گونده‌مینده‌دیر و سون اوچ گون عرضین‌ده ۴ مین نفر ایرانا قایتاریلیب.

Axar.az خبر وئریر کی، بونو ایران حکومتینین سؤزچوسو فاطمه مهاجرانی دئییب.

او، «مقدراتینی تعیین ائتمه»سینی سوریا خالقینین حاقی حساب ائدیب و بو اؤلکه‌نین خالقی اوچون ان یاخشی‌سینی آرزولاییب.

"سوریا اوردوسو سلاحلی مخالفتله مباریزه آپارا بیلمه‌دی و یا آپارماق ایسته‌مه‌دی و بونون نتیجه‌سینده سوریادا رژیم دییشیکلیینین شاهدی اولدوق. بیز سوریاداکی حادثه‌لری ایزلییریک، دینی و دیپلماتیک مکانلارین تهلوکسیزلیینین قورونماسینا خصوصی دقت یئتیریریک"،- مهاجرانی علاوه ائدیب.

حکومت سؤزچوسو سوریادا ثابت‌لیک یاراندیقدان سونرا یئنی رهبرلیکله مذاکیره‌لر آپاراجاقلارینی دئیه‌رک شرط ایر‌لی سوروب:

"ایران حکومتی اوچون اؤنملی اولان اونلارین (سوریانین یئنی حکومتینین- رئد) اسرائیله قارشی موقعی‌دیر".

قید ائدک کی، سوریا اوپوزیسیونونون اساس لیدرلریندن اولان "هیئتی تحریر الشام"ین رهبری ابو محمد جولانی، ایران و لیواینین "حزبوللاه" تشکیلاتینی سوریانین اساس دوشمنلری آدلاندیریب و هر ایکی قوه‌نین سوریانین ثابت‌لییی اوچون جدی تهلوکه حساب ائتدیینی بیلدیریب.

"ایران و حزب‌الله سوریانین ملی بیرلیینه و ثابیتلیینه قارشی ان بؤیوک تهدیددیر. بیزیم مقصدیمیز سوریادا امین-آمان‌لیق یاراتماق و بو قوه‌لرین تأثیرینی سونا چاتدیرماقدیر"،- او وورغولاییب