غربی آذربایجان ایالتی‌نین مرکزی اورمییا شهرین‌ده ازدحاملی اعتراض آکسییاسی کئچیریلیب.

Axar.az خبر وئریر کی، بو باره‌ده یئرلی مئدیا و سوسیال مئدیا شبکه‌سینده پایلاشیملار ائدیلیب.

اورمییانین مرکزی کوچه‌لرینه آخیشان اون مینلرله آذربایجانلی، کوردلرین غربی آذربایجان ایالتینه قارشی تورپاق ادعالارینا اعتراض ائدیبلر.

"آذربایجان اویاقدی، کوردلر بیزه قوناقدی"، "آذربایجان وار اولسون، ایسته‌مه‌ین کور اولسون!"، "اورمییا تورکوندور، تورکون قالاجاق"، "تورک دیلینده مدره‌سه، اولمالیدیر هر کسه"، "بو تورپاقدان پای اولماز، اورمو کوردوستان اولماز" و باشقا بو کیمی شعارلار سسلندیریلیب.

بعضی معلوماتلاردا آکسییا اشتراک‌چیلارینین سایینین ۱۵۰ میندن چوخ اولدوغو قید اولونسا دا، یاری رسمی معلومارلاردا بو، ۱۰ مینلرله گؤستریلیب.

خصوصاً ۱۰ مینلرله قادینین قوشولدوغو آکسییانی داغیتماق اوچون پلیس، موتوسیکلتلی خصوصی قوه‌لر، تهلوکه‌سیزلیک مأمورلاری و تکنیکا جلب اولونوب.

چوخ سایدا انسانین ساخلانیلدیغی، اونلارلا نفرین خسارت آلدیغی بیلدیریلسه ده، بو رسمی شکیلده تصدیق اولونماییب.

خاطیرلاداق کی، بایرام قاباغی مراسیملرده، خصوصاً مارتین ۱۸-ده کوردلر شنلیک تدبیرلرینی سیاسی میتینگه چئویره‌رک، آذربایجان تورپاقلارینا، او جمله‌دن اورمییایا تورپاق ادعالاری ایر‌لی سوروبلر.

اؤز میللی گئییملرین‌ده مراسیمه قوشولان چوخ سایدا مهاجر کوردلر و باشقا شهرلردن اورمییایا گتیریلن قوناقلار "اورمییا کوردوستان‌دیر" شعارلاری سسلندیریب، بیر نئچه یئرده، عراق کوردوستانینین بایراقلارینی قالدیریبلار.

بوندان بیر نئچه ساعت سونرا ایسه اورمییانین "مئشه پارکی"نا توپلاشان آذربایجان تورکلری مهاجر کوردلرین تورپاق ادعالارینا جاواب اولاراق "آذربایجان وار اولسون، ایسته‌مه‌ین کور اولسون" شعارلاری سسلندیریبلر.

قید ائدک کی، بوندان اول یئرلی دولت قوروملاری آذربایجان تورکلرینین اورمییادا چرشنبه مراسیمی کئچیرمه‌لرینه اجازه وئرمه‌دیی حال‌دا، کوردلرین اوخشار مراسیم کئچیرمه‌لرینه رسمی اجازه وئرمیشدی.