جنوبی قفقازدا مختلف لایحه‌لر واسطه‌سیله نقلیات کومونیکاسییالارینین آچیلماسی و رگیونون بوتون اشتراک‌چیلارینین ماراقلارینین اوزلاشدیریلماسی آسان دئییل، اما بو، ممکن اولمادیغی آنلامینا گلمیر. ساده‌جه، بو پروسس چوخ جدی و حساس ایش طلب ائدیر.

Axar.az خبر وئریر کی، بونو ارمنی پولیتولوگ آلکساندر اسگندریان دئییب.

اکسپرت ایروانین تکلیف ائتدیی «صلح قووشاغی» و «ترامپ یولو» (یاخود زنگزور دهلیزی) لایحه‌لرینین پرسپکتیولرینه توخونوب:

«اگر پرسپکتیودن دانیشساق، بونلار بیر-بیریندن چوخ فرق‌لی مسئله‌لردیر. نهایت، باش وئره‌نلر سون دئییل، هله باشلانغیج‌دیر. واشینگتن‌دا امضالانان سند بیر بیان‌نامه‌دیر، بو بیان‌نامه ایله ارمنستان و آذربایجان کومونیکاسییا خطلرینین ضروری اولدوغونو قبول ائدیرلر».

اسگندریانین سؤزلرینه گؤره، خصوصیله «ترامپ یولو»نون حیاتا کئچیریلمه‌سی ایله باغلی سیاسی-تکنیکی چتین‌لیکلر وار، بو موضوع‌دا ارمنستان و آمریکا دانیشیقلار آپاریر:

«بورادا هم سیاسی، هم ده تکنیکی مانعه‌لر وار و بوتون بونلار حل ائدیلمه‌لیدیر. مطلق نظره آلمالیییق کی، وضعیت مرکب‌دیر: آراز چایینین او بیری طرفینده ایران‌لی سرحدچیلر، ارمنستان طرفینده روس و ارمنی سرحدچیلر وار، چوخ یاخینلیق‌دا آوروپا مشاهده‌چیلری یئرلشیر، ساغ و سولدا آذربایجانلیلار، بیر قدر آرالیدا تورکلر. همچینین، ایران‌لیلار ارمنستانا یول چکیرلر، قافان شهرینده ایران کونسوللوغو، گوروسدا فرانسا کونسوللوغو وار، روسیا دا قافان‌دا کونسوللوق آچماق ایستییر. ایندی بونلارا آمریکالیلاری دا علاوه ائدیریک، ایندی بوتون بونلارین نئجه حل ائدیله بیلجیینی دوشونملیییک. چونکی ایران، آمریکا، روسییا، ترکیه، آذربایجان و ارمنستانین ماراقلارینی اوزلاشدیرماق آسان دئییل. بونونلا بئله، بو ممکن‌سوز دئییل، ساده‌جه، چوخ جدی ایش طلب ائدیر، هله بؤیوک یول قطع ائدیلمه‌لیدیر».

ارمنی پولیتولوگ پروسسین مرکب و اوزون مدت‌لی اولدوغونو بیلدیریب و دنیادا بونا بنزر چوخلو نمونه‌لرین موجودلوغونو خاطرلادیب:

«من همیشه بلاروسلا روسیانین کالینینگراد ویلایتینی بیرلشدیره‌ن یولو نمونه گتیریرم: او یول لیتوانین اراضی‌سین‌دن کئچیر، حالبوکی لیتوا ناتو و آوروپا اتفاقینین عضوودور. بونا باخمایاراق، راضیلاشما وار کی، روسیا وطنداشلاری کالینینگرادا ویزاسیز، حتی پاسپورتسوز گئده بیلیرلر. دئمه‌لی، بئله لایحه‌لر ممکن‌دور، ساده‌جه چوخ حساس و دقتلی ایش طلب ائدیر».

خاطرلاداق کی، آذربایجانین اساس حیصه‌سی ایله ناخچیوان آراسین‌دا آچیلماسی پلانلاشدیریلان زنگزور دهلیزی اوچون کالینینگراد مدلینین تطبیق اولوناجاغی گؤزلنتیلر آراسیندادیر.