صدام حسین‌دن سونرا عراق‌دا یارانان بوشلوقدان استفاده ائد‌رک شیعه گروپلاشمالاری آراسیندا نفوذونو آرتیران ایران حکومتی سرعتله بو نفوذو ایتیرمکده‌دیر. رسمی بغدادین طرفسیز ملی سیاست یوروتمه‌یه باشلاماسی ایله عینی واختدا ایران تأثیری آلتیندا اولان گروپلاشمالار دا تهران‌دان اوزاقلاشماغا باشلاییبلار. بو، هم ده ایران-آمریکا و ایران-اسرائیل قارشی‌دورمالاری نتیجه‌سینده عراقین ضربه‌لردن یایینماسی اوچون واجیب عامللردن بیری حساب ائدیلیر.

خصوصاً سون زمانلار تهرانین ضعیفله‌مه‌سی، آمریکا و اسرائیل قارشی‌سیندا عاجیزلییی، یئنی سیاسی دور و ایستراتگیانین تطبیقینه باشلایان بغدادین وضعیت‌دن استفاده ائد‌رک ایرانین تأثیر دایره‌سیندن چیخماقدا، عرب اؤلکه‌لری ایله مناسبتلرینی داها دا گئنیشلندیرمکده قرارلی اولدوغو گؤرسنیر.
سوریادا بشار اسد رژیمینین سقوطو، ایرانین دستکلدیی حماس و حزبوللاهین آغیر ضربه‌لر آلماسی و یمن هوسیلرینین گوجونون آزالماسی عراق‌دا یئنی نسیل سیاستچیلرین ایران هگومونلوغونا قارشی چیخمالارینا شرایط یارادیب. بونونلا دا بو اؤلکه‌ده ایرانین ان گوجلو تأثیر عاملی اولان "حشد الشعبی" سلاحلی گروپلاشماسینین قوردوغو شبکه چؤکمک‌ده، گروپلاشما لیدرلری ایسه اؤلکه قانونلاری چرچیوه‌سینده سئچکیلره قوشولماغا اوستونلوک وئرمکده‌دیرلر.

سون واختلار سپاه کوماندیرلریندن داها چوخ ایران‌لی سیاستچیلرین، رسمی شخصلرین بغدادا سفرلری ده "حشد الشعبی"نین نفوذونون آزالماسی و ایرانین حربی تأثیر امکانلارینی ایتیردیی اوچون سیاسی تأثیر گؤسترمه‌یه چالیشدیغینا دلالت ائدیر.

حادثه‌لرین گئدیشاتی گؤستریر کی، ۲۰۲۵-جی ایلده عراق‌دا باش وئرن پروسسلر یاخین شرق دوزه‌نینده یئنی بیر مرحله‌نین باشلانغیجی‌دیر. اوزون ایللر بویو بؤیوک مالیه و حربی خرجلر حسابینا تهران‌دان آرالیق دنیزینه قدر "شیعه هلالی"نی گئنیشلندیرمه‌یه چالیشان ایران حکومتی ایندی هر یئرده اوغورسوزلوقلا اوزلشیر. خصوصاً عراق‌دا یئنی مستقل سیاسی دورون باشلاماسی، ایرانین سوریادان سونرا ان بؤیوک ایدئولوژی سنگرلریندن بیرینین الده‌ن چیخماسی و "شیعه حلالی" لایحه‌سینین تمامیله ایفلاسا اوغراماسی دئمکدیر.

بونونلا یاناشی، پاکستان و افغانستان حکومتلری ده ایرانا باغلی "زینبیون" و "فاطمیون" گروپلاشمالارینا قارشی جدی تدبیرلر گؤرمه‌یه باشلاییبلار.

قید اولونان بؤلگه‌لرده ایدئولوژی مغلوبیت‌دن سونرا علی خامنه‌ای‌نین نظارتینده اولان سیاسی جریان و سپاه اورتا آسیا و جنوبی قفقازدا فعاللاشماغا چالیشسا دا، وضعیتدن ایر‌لی گلن مجبوریتلره گؤره حاضرکی حاکمیتین بونو رئاللاشدیرماغا گوجو و ماراغینین اولمادیغی حس اولونور. خصوصاً مسعود پزشکیان حکومتینین مجبوریت قارشی‌سیندا دا اولسا، قونشولارلا مناسبتلرده یئنی مرحله‌نین باشلادیلماسی استقامتین‌ده‌کی سعیلری تهرانین یئنی سیاسی-ایدئولوژی سنگرلر قورماسینین چتین اولاجاغیندان خبر وئریر.

بو گون ایسه عراق حکومتینین ایرانا باغلی لیوان حزبوللاهی و یمن حوثیلرینی ترورچو تشکیلاتلار سیاهی‌سینا سالماسینی اعلان ائتمه‌سی عراق‌دا کئچیریلن سون پارلامنت سئچکی‌سیندن سونرا ایرانین بؤلگه‌ده داها چوخ تجرید اولونماسی و تهرانین بغداد قارشی‌سیندا خاللارینین سرعتله آزالماسی دئمکدیر. بو، هم ده ایران‌دا ملالارین حاکمیته گلیشیندن سونرا باشلایان ۸ ایللیک محاربه و اوندان سونراکی دؤورلرده‌کی کئشمکئشلردن یورولان عراق‌لیلارین ایران مداخله‌لرینه اعتراضلارینین تظاهرودور.