ایران حکومتی سپاه-ین قدس قوه‌لرینین واسطه‌سیله آفریکا اؤلکه‌لرین‌ده ده جاسوس شبکه‌سینی گئنیشلندیرمه‌یه، سیاسی-ایدئولوژی تبلیغاتینی آرتیرماغا و تأثیر امکانلارینی گئنیشلندیرمه‌یه چالیشیر.

ایران بوندان اول بونو نیجرییادا حیاتا کئچیره، «نیجرییا اسلام حرکاتی» واسطه‌سیله باجارا بیلسه ده، باشقا آفریکا اؤلکه‌سی اولان چاد بونون قارشی‌سینی آلماغا، ایرانین جاسوس شبکه‌سینی داغیتماغا نایل اولا بیلیب.

آرگنتینانین "اینفوبائ" نشرینین ده یایدیغی معلوماتا گؤره، چاد تهلوکه‌سیزلیک قوروملاری سپاه-این قدس قوه‌لرینین ایکی جاسوس و عملیات شبکه‌سینی ایفشا ائدیب.

نشرین بیلدیردیینه گؤره، ایران حکومتی ایله علاقه‌لی اولان ایکی ترور شبکه‌سینین بیر نئچه عضوونون حبسی اسلام انقلابی کئشیک‌چیلری کورپوسونون قدس قوه‌لرینین و ایران اسلام رسپوبلیکاسی کشفیات ناظرلیینین آفریکادا تخریبات، جاسوسلوق اوچون ایستروکتورلار یاراتماق فعالیتینی ایفشا و ایفلیج ائدیب. معلوماتا گؤره، تهران دینی تأثیر، ایدئولوژی تعلیم، حربی دستک و عملیات رهبرلیینین کومبیناسییاسی واسطه‌سیله آمریکا و اسرائیلین ماراقلارینا هجوم ائتمک و آفریکا حکومتلرینی غیری-ثابیتلشدیرمک اوچون شبکه‌لر یاراتماغا چالیشیر.

ساخلانیلانلاردان بیری اولان علی عبداللهی محمداتین اعترافلاری گؤستریر کی، او، ایرانین سیاسی-ایدئولوژی مرکزلریندن بیری اولان قم شهرین‌ده‌کی المصطفی اونیورسیتتین‌ده تحصیل آلدیقدان سونرا کشفیات آگنتلری طرفیندن ایشه جلب ائدیلیب.

چاددا اسلام رسپوبلیکاسی ایله علاقه‌لی ایکی شبکه‌نین آشکارلانماسی تهرانین آفریکا اؤلکه‌لرینه نفوذ ائتمک و ثابت‌لییی پوزماق پلانینین یئنی اؤلچولرینی اورتایا چیخاریب. توتولانلارین اعترافلارینا گؤره، بو پلان غرب ماراقلارینا قارشی عملیاتلار آپارماق اوچون قوه‌لرین جلب ائدیلمه‌سینی، تعلیم کئچیریلمه‌سینی و تشکیل ائدیلمه‌سینی احاطه ائدیر.

دیندیرمه‌لر زمانی محمدات ۲۰۲۲ و ۲۰۲۳-جو ایللرده ایران‌داکی هتل‌لرده و تهلوکه‌سیز یئرلرده ایران‌لی مأمورلارلا گؤروشدویونو و بو مأمورلارین اونا غرب هدفلرینی معین ائتمک، قوه‌لر جلب ائتمک، عصیان‌چی گروپلاری ایزله‌مک و چادداکی آمریکا، اسرائیل و فرانسا قوه‌لرینین موجودلوغو حاقیندا حساس معلوماتلاری اؤتورمک میسیاسینی تاپشیردیغینی سؤیلیب.

بو، سپاه-ین قدس قوه‌لرینین اوگاندا و سنگال‌دا اسرائیل سفیرلیکلرینه قومبارا ایله هجوم ائتمک اوچون بیر اوگاندا وطنداشینی جلب ائتمه‌سی، آنجاق ترورچونون آشکارلاناراق حبس ائدیلمه‌سی باره‌ده خبرین یاییلماسی ایله عینی واختا تصادف ائدیر.

بونونلا یاناشی، چاد تهلوکه‌سیزلیک مأمورلاری خارجی عملیاتلار آپارماق، عراق و آفریکادا پروکسی قوه‌لره رهبرلیک ائتمکدن مسئول اولان سپاه-ین قدس قوه‌لرینین ۴۰۰ سایلی بؤلمه‌سی طرفیندن ایشه گؤتورولموش عبدالله احمد شیخ الامینی ده ساخلاییب.

شیخ الامین بو ایستروکتورون کوماندانلیغینین همید عبداللهی آدلی بیر شخصین علین‌ده اولدوغونو و ابو علی و آیدین سالاه‌لو آدلی شخصلرین ده شبکه‌نین اداره اولونماسین‌دا رول اوینادیغینی اعتراف ائدیب.

او، اعترافین‌دا عراق‌داکی سلاح تعلیمی باره‌ده معلومات وئریب و بیلدیریب کی، اسلام رسپوبلیکاسینا باغلی شبکه قوه‌لری «دینی سفر» آدی آلتین‌دا شیعه پروکسیلری ایله علاقه‌لی بازالارا کؤچورولوب، اونلارا «کالاشنیکوو»، قومبارااتان و باشقا سلاحلاردان استفاده اؤیردیلیب.

او، همچینین اکسترمیست شبکه‌لرین کئچمیش کوماندیری موسی باتران آباکیر المیسکینین اسلام رسپوبلیکاسی اوچون یئنی قوه‌لرین جلب ائدیلمه‌سینده‌کی رولو باره‌ده ایفشا ائدیجی معلوماتلار وئریب.

چاد تهلوکه‌سیزلیک رسمیلری بیلدیریرلر کی، بو شبکه‌لرین داغیدیلماسی اسلام رسپوبلیکاسینین تأثیرینی گئنیشلندیرمک و آفریکا قیطعه‌سینده ثابت‌لییی پوزماق سیلرینی ان آزی موقتی اولاراق دایاندیریب.

خاطرلاداق کی، ۲۰۱۹-جو ایلین اولین‌ده سپاه-ین نیجرییاداکی قدس قوه‌لرینین ۴۰۰-جو بؤلمه‌سینین یوکسک وظیفه‌لی عضوو اسماعیل محمد جده‌ده سعودیه عربستانی رسمیلرینه قارشی عملیاتلار پلانلاشدیرماقدا و آمریکا و آوروپا هدفلری حاقین‌دا کشفیات معلوماتی توپلاماق‌دا اتهام اولونموشدو. بو ایسه ایران اسلام رسپوبلیکاسینین بیر نئچه ایل اولدن آفریکا اؤلکه‌لری، خصوصاً نیجرییا و چاددا جاسوس و ترور شبکه‌سی قوردوغونا دلالت ائدیر.
بو حادثه‌لردن سونرا نیجرییادا اسلام دولتینین قورولماسینی طلب ائد‌ن ایرانا باغلی "نیجرییا اسلام حرکاتی"نین فعالیتینه ۲۰۱۹-جو ایلده قاداغا قویولوب.

حرکاتین باش‌ی‌سی، بوندان اول ترورچولوق اتهامینا گؤره حبس اولونان ابراهیم زکزاکی ایران رهبری علی خامنه‌اینین آفریکاداکی مهم نماینده‌لرین‌دن ساییلیر و ایرانا سفرلری زمانی خامنه‌ی ایله گؤروشلر کئچیریر، مصلحتلشمه‌لر آپاریر.

قید ائدک کی، بو ایشلرین چوخونون مرکزینده ایرانین قم شهرینده یئرلشن المصطفی جمعیتی دایانیر. آفریکا، آسیا و آوروپادا ۵۰-دن چوخ فیلیالی اولان بو جمعیتی آمریکا ۲۰۲۰-جی ایلده "خصوصی گلوبال ترور تشکیلاتی" کیمی تانیییب.

طلبه‌لرینین ۸۰%-ی خارجی وطنداشلاردان عبارت اولان بو مرکز سپاه و ایرانین تهلوکه‌سیزلیک ناظرلیینین نظارتی و مالیه دستیی ایله فعالیت گؤستریر. همین مرکزده آفریکا، عرب اؤلکه‌لری ایله یاناشی، ترکیه، جنوبی قفقاز و اورتا آسیا اؤلکه‌لرینین ده گنجلری تحصیل و تعلیم آلیر.