بون‌دان اول تهرانین «آزادی» ایستادیونوندا تورکلره قارشی سسلندیریلن شعارلار البته کی، قبول ائدیلمزدیر، بو، هم ده منه قارشی حرمت‌سیزلیک ایدی. بونون آرخاسین‌دا هانسی‌سا مقصدلی شکیل‌ده پلانلاشدیریلمیش فتنه ده اولا بیلر.

بونو Axar.az-آ تهرانین "پرسپولیس" کمانداسینین باش مشق‌چی‌سی کریم باقری دکابرین ۱۸-ده تبریزین «سهند» (یادگاری امام) استادیونون‌دا سسلندیریلن تحقیرآمیز ایفاده‌لرله باغلی آچیقلاماسیندا دئییب.

او، تبریزده بیر گروپ "تراکتور" آزارکشینین ده تهران‌دا سسلندیریلن تحقیرلره جواب اولاراق "ادبسیز" ایفاده‌لریندن ناراحات اولدوغونو، آنجاق بونون باشادوشولن اولدوغونو سؤیله‌ییب:

"فوتبول یاریشلارین‌دا رقیب کوماندالارین آزارکشلرینین بئله حاللارا یول وئرمه‌سی، نالایق شعارلار سسلندیرمه‌لری بوتون اؤلکه‌لرده باش وئریر، بیز ده بوندان استثنا دئییلیک، ناراحات ائدیجی اولسا دا باشادوشولندیر. بونون باشقا موستویه کئچمه‌سینه و بو حادثه‌لردن سوء استفاده ائتمه‌یه چالیشانلارین داها چوخ فتنه تؤرتمه‌لرینه اجازه وئرمه‌ملیییک".

تبریزلی باش مشق‌چی «سهند» ایستادیوندا شخصینه قارشی ایشله‌دیلن تحقیرلره ده مناسیبت بیلدیریب:

"تبریزلییه‌م، آذربایجان‌لییام، تورکم و بونونلا هر زمان فخر ائتمیشم. هارادا اولسام، هانسی کوماندایا باشچی‌لیق ائتسم ده، تبریز و "تراکتور" منیم اوچون عزیزدیر. "تراکتور" منیم اوشاقلیق، یئنی‌یئتمه‌لیک و گنجلیک واختلاریمدا ایده‌آلیم اولدوغو کیمی، ایندی ده منیم ان سئودییم کوماندادیر. همشهرلیلریمین منه قارشی آجیقلی سؤزلرینی ایسه منه ارک ائتمه‌لرینین، مندن اوماجاقلارینین چوخ اولماسینین حسابینا قویورام. بیر دسته‌نین منه قارشی حاقلی-حاق‌سیز سؤیوشلری، منیم ده اونلارا قارشی آجیقلی اولماغیما سبب اولا بیلمز".

کریم باقری بوندان اول تهران‌دا "پرسپولیس" کمانداسینین آزارکشلرینین تورکلره قارشی تحقیرلرینه جواب وئرمه‌مکده گناهلاندیریلماسینا دا توخونوب:

"عمومیتله اینتریگا، قارشی‌دورما و بو کیمی مسئله‌لره قاریشماق منیم کاراکتریمه ضددیر. بلکه ده بعضا سوسماق ان یاخشی جواب‌دیر. بونونلا باغلی مشهور سؤز ده وار، "آخماقلارین جوابی سکوت‌دور!"

قید ائدک کی، دکابرین ۱۸-ده تبریزین «سهند» ایستادیونوندا ایران کلوب فوتبول کوبوکونون ۱/۸ فینال مرحله‌سینین اویونلاری چرچیوه‌سینده تبریزین "تراکتور" و تهرانین "پرسپولیس" کماندالارینین اویونو کئچیریلیب.

گرگین شرایط‌ده کئچیریلن قارشیلاشما ۹۰ دقیقه عرضینده ۱:۱ برابر حسابی ایله باشا چاتیب.

پنالتی ضربه‌لریندن سونرا "تراکتور" ۹:۸ حسابی ایله تهران تمثیل‌چی‌سینی مغلوب ائدیب.

همین قارشیلاشما زمانی "تراکتور" آزارکشلری "پرسپولیس" کومانداسی و باش مشق‌چی‌سی تبریزلی کریم باقری‌یه قارشی تحقیرآمیز ایفاده‌لر ایشلدیبلر.