ایران‌دا کئچیریلن اعتراض آکسیالاری زمانی سون ایکی گون عرضینده بعضی شهرلرده حکومت قوه‌لرینین اعتراضچیلارا قارشی تمکین‌لی داوراندیغی باره‌ده گؤرونتولر یاییلیب.

بو قبیل‌دن اولان حادثه‌لردن بیری ده، اؤتن گون ایلام ایالتینین آبدانان شهرینده باش وئریب.

پلیس قوه‌لری "دیکتاتورا اؤلوم"، "خامنه‌ای‌یه اؤلوم" شعارلاری سسلندیره‌رک مرکزی کوچه‌لره آخیشان اعتراضچیلارا قارشی جدی رئاکسیا گؤسترمه‌ییب.

شهر مرکزین‌ده یئرلشن ۱۱-جی پلیس بؤلمه‌سینین امکداشلاری پلیس اداره‌سی بیناسینین دامینا چیخاراق اعتراضچیلارا ال ساللاییب، اونلاری سلاملاییبلار.

بعضی خاریجی مئدیا اورگانلاریندا بو، "اعتراضچیلارین شهری اله کئچیرمه‌سی" کیمی قلمه وئریلسه ده، مسئله‌نین کؤکونده آمریکا پرزیدنتی دونالد ترامپین بیاناتی دایانیر.

ترامپ بیر هفته عرضینده ایکی دفعه بیانات یایاراق، ایران حکومتینه اعتراضچیلاری اؤلدورجیی تقدیرده آمریکانین سرت رئاکسیا وئرجیی باره‌ده سرت خبردارلیق ائدیب.

خصوصاً ملکشاهی و آبدانان شهرلرینده اعتراضچیلارا قارشی قدار داورانان، بیر نئچه نفری اؤلدورن حکومت مأمورلاری ترامپین ایکینجی خبردارلیغیندان سونرا داها تمکین‌لی حرکت ائتمه‌یه باشلاییبلار.

بعضی غیری-رسمی معلوماتلاردا بونون مسعود پزشکیانین طلبی ایله ائدیلدیی، آکسیالارین گئنیشله‌نمه‌مه‌سی، اعتراضچیلاری غضبلندیرمه‌مک اوچون پرزیدنتین خصوصی گؤستریش وئردیی ادعا اولونور.

بو احتمال منطیق‌لی گؤرونور، اونا گؤره کی، اعتراضچیلارا قارشی مناسبت‌ده مسعود پزشکیانلا علی خامنه‌ای‌نین باشچی‌لیق ائتدیی سرت خط طرفدارلاری، او جمله‌دن محکمه سیستمینین باشچی‌سی غلامحسین محسنی اژه‌ای و پارلامنت صدری محمد باقر قالیبافین مؤقعلری آراسیندا کسکین فرق وار.

پرزیدنت اعتراضچیلارا قارشی گوج تطبیق ائتمه‌میی، اونلارلا دانیشیق آپارماغی تکلیف ائتسه ده، ایکینجی طرف ناراضیلاری اغتشاش‌چی آدلاندیریر، اونلاری دوشمن دولتلرین تحریکی ایله آکسیا کئچیردیکلرینی ادعا ائدیر و باره‌لرینده سرت جزا تدبیرلرینین گؤرولمه‌سینی طلب ائدیر.

گؤرونور اولدن ده غرب، خصوصاً آمریکا ایله بیرباشا دانیشیقلارین طرفداری اولان مسعود پزشکیان دونالد ترامپین خبردارلیغیندان نتیجه چیخارسا دا، خامنه‌ای طرفدارلاری وطنداشلارا قارشی سرت مؤقعلرین‌دن گئری اوتورماق ایستمیرلر.

هم ده بو اونا گؤره‌دیر کی، ۱۰ گوندور داوام ائد‌ن اعتراض آکسیالارین‌دا مسعود پزشکیانا قارشی هر هانسی شعار سسلندیریلمدیی حال‌دا، علی خامنه‌ای و اونون باشیندا دوردوغو "ویلایت فقیه" اینستیتوتو هدف آلینیر.