بو گون - اوکتیابرین ۱۸-ی جبرائیل رایونوندا یئرلشن قدیم خدآفرین کؤرپوسونون و اطراف اراضیلرین ارمنیستان سلاحلی قوه‌لرینین اشغالیندان آزاد ائدیلمه‌سینین ایلدؤنومودور.

Axar.az خبر وئریر کی، آذربایجان ایران سرحدینده، آراز چایینین اوزرینده یئرلشن کؤرپونون ارمنی اشغالچیلاریندان تمیزلنمه‌سیندن ۳ ایل اؤتور.

۲۰۲۰-جی ایلین اوکتیابرین ۱۸-ده خدآفرین کؤرپوسو ایله یاناشی جبرائیلین داها ایکی یاشاییش منطقه‌سی - حاجیلی و حاجی اسحاقلی کندلری اشغالچیلاردان آزاد ائدیلیب.

آزاد اولونانین اراضیلره آذربایجانین اوچرنگلی شانلی بایراغی سانجیلیب.

قید ائدک کی، آذربایجان معمارلیق مکتبی اسلوبوندا انشا اولونموش ۱۱ تاغلی خدآفرین کؤرپوسو ایران-آذربایجان سرحدینده، آراز چایی اوزرینده یئرلشن ۱۱-جی-۱۲-جی عصرلره عاید کؤرپونون قالیقلاریدیر. کؤرپو داشدان تیکیلمیش و یاخشی یونولموش ایری داش لوحه‌لرله اوزلنیب. تدقیقاتچیلار اونون ۱۳-جو یوزایلده، الخانیلرین (هولاکولر) حاکمیتی ایللرینده آنتیک دؤور کؤرپوسونون قالیقلاری اوزرینده یئنی‌دن تیکیلدیی فکرینده‌دیرلر. کؤرپونون اوزونلوغو ۱۳۰ متره یاخین، ائنی ۶ متر، چای سوییه‌سیندن هوندورلویو ۱۲ متردیر. حاضردا اوچ اورتا تاغی سالامات قالیب، ساحل تاغلاری ایسه ۲۰-جی عصرین ۳۰-جو ایللرینده اس.اس.ار.ای-نین قراری ایله داغیدیلیب.

اون بئش تاغلی خودآفرین کؤرپوسو ایسه ۱۳-جو عصره عاید ائدیلیر. حمدالله قزوینینین یازدیغینا گؤره، اونو هجری تقویمی ایله اون بئشینجی ایلده (میلادی تقویمی ایله ۶۳۹-جو ایل) محمد پیغمبرین یاخین سلاحداشی بکر ابن عبدالله تیکدیریب. کؤرپو تاغلارینین دایاقلاری طبیعی اؤزوللر - قایالار اوزرینده اوجالدیغیندان آشیریملار مختلف اؤلچولو و سربست دوزوملودور. بیشمیش کرپیج و چای داشلاریندان تیکیلمیش کؤرپونون اوزونلوغو ۲۰۰ متره یاخین، ائنی ۴، ۵ متر، چای سوییه‌سیندن ان بؤیوک هوندورلویو ۱۲ متردیر.

ایپک یولونون اوزرینده یئرلشه‌ن خدافرین کؤرپولری حاقیندا تاریخی منبع‌لرده اطرافلی معلوماتلارا راست گلمک اولور. تاریخه شاهدلیک ائد‌ن بو کؤرپولر قدیم و اورتا عصرلرده کمونیکاسییا واسطه‌سی کیمی بؤیوک رول اویناییب، آذربایجان ائللرینین جنوبدان قاراباغا گئدن کؤچ یولونون اساس قووشاغی اولوب.

تاریخاً آذربایجانین شمالی ایله جنوبونو بیرلشدیرن خدآفرین کؤرپولری هم ده سیموولیک عابده حساب اولونور. آذربایجان معمارلیق مکتبینین بو عظمتلی عابده‌سی دنیانین بیر چوخ تاریخ‌چیلرینین دقتینی جلب ائدیب. خدآفرین کؤرپولری آذربایجان معمارلارینین مستثنی مهندیسلیک باجاریغینین ان گؤزل نمونه‌لریندن ساییلیر. تدقیقات‌چیلارین بیر چوخونون فکرینجه، کؤرپولرین دایاقلاری چایین اورتاسینداکی اولان طبیعی سال داشلار اوزرینده قورولدوغوندان اونا «خدآفرین» آدی وئریلیب. بو کؤرپولرین آذربایجانین هیندیستاندان باشلایاراق یاخین و اورتا شرق اؤلکه‌لری، روسیا و غربی آوروپا اؤلکه‌لری ایله اقتصادی و مدنی علاقه‌لرینین انکشافیندا بؤیوک رول اوینادیغی باره‌ده فکیرلر سؤیلنیلیر.

ارمنیستان سلاح‌لی بیرلشمه‌لرینین ۱۹۹۳-جو ایلده اشغال ائتدیی جبرائیل رایونونون اراضی‌سینده یئرلشه‌ن خدافرین کؤرپوسونون اوزرینده ۲۷ ایل سونرا آذربایجان بایراغی اوجالدیلدی. قاراباغ‌دا پارلاق غلبه‌لره امضا آتان مظفر آذربایجان اردوسو بو دیرلی عابده‌نی اؤزوموزه، اصل صاحبینه قایتاردی. بئله‌لیکله، ۲۰۲۰-جی ایل اوکتیابرین ۱۸-ی تاریخیمیزه داها بیر شانلی گون کیمی یازیلدی.

حاضردا آراز چایی اوزرینده «خدافرین» و «قیز قالاسی» هیدروقووشاقلاری و سو الکتریک استانسییالارینین تیکینتی‌سی داوام ائتدیریلیر.
آذربایجانین وطن محاربه‌سینده دشمن اوزرینده قالیب گلمه‌سیندن ۶ گون سونرا – ۲۰۲۰-جی ایلین نویابر آینین ۱۶-دا پرزیدنت ایلهام علیئو و و بیرینجی خانیم مهریبان علیئوا اشغالدان آزاد ائدیله‌ن جبرائیل رایونوندا اولوبلار. پرزیدنت جبرائیل شهرینده و خدافرین کؤرپوسونده شانلی آذربایجان بایراغینی قالدیریب. دولت باشچی‌سینین بایراغیمیزی تاریخی خدافرین کؤرپوسونده قالدیرماسی آذربایجان خالقی اوچون غرور و فخارتدیر. خالقیمیزین معنویاتیندا، تاریخینده درین ایز بوراخان خدافرین هم ده میللی غرور مسئله‌سی ایدی.

خاطیرلاداق کی، پرزیدنت ایلهام علیئوین ۲۰۲۰-جی ایلین دکابرین ۲۴-ده و ۲۰۲۱-جی ایلین ایونون ۲۴-ده امضالادیغی موافق سرانجاملارا اساساً، بیر گروپ حربی قوللوقچو «جبرائیلین آزاد اولونماسینا گؤره» مدالی ایله تلطیف ائدیلیب. رایونون، او جمله‌دن خدافرین کؤرپوسونون اشغالدان آزاد اولونماسی اوغروندا آپاریلان دؤیوش عملیاتلاریندا اشتراک ائد‌رک شخصی ایگیدلیک و شجاعت نمایش ائتدیرن اون مینلرله حربی قوللوقچو «جبرائیلین آزاد اولونماسینا گؤره» مدالی ایله تلطیف اولونوب.

قید ائدک کی، بو ایلین ماین ۴-ده پرزیدنت ایلهام علیئو جبرائیل رایونوندا خدافرین قصبه‌سینین تملینین قویولماسی تدبیرینده اشتراک ائدیب. قصبه آذربایجان خالقی اوچون تاریخی اهمیت داشییان خدافرین کؤرپوسونون یاخینلیغیندا، یئنی دمیر یولو خطیندن و آوتوموبیل یولوندان ۷ کیلومتر مسافه‌ده سالینیر، لایحه‌لندیریله‌ن عمومی اراضی‌سی ۲۵ هکتاردیر. باش پلانا اساساً، گله‌جکده بورادا ۱۴۹ ائو تیکیله‌جک. قصبه‌ده بیرینجی مرحله‌ده ۲۰ ائوین انشاسی نظرده توتولور. بورادا ایکی، اوچ، دؤرد و بئش اوتاقلی فردی ائولر تیکیله‌جک. هر ائوین حیاط‌یانی ساحه‌سی ۶۰۰ کوادراتمتر تشکیل ائد‌جک. قصبه‌یه بیرینجی نؤوبه‌ده ۷۷ ساکن کؤچورولجک.