ایران عالی محکمهسی "اکباتان شهرجیی" کیمی تانینان ایشده تقصیرلندیریلن شخصلردن ایکیسی میلاد آرمون و نوید نجارانین اؤلوم حکملرینی تصدیق ائدیب.
Axar.az خبر وئریر کی، بو بارهده انسان حاقلاری تشکیلاتلاری معلومات یاییب.
معلوماتا گؤره، ایشده باشقا ایکی تقصیرلندیریلن شخص مهدی ایمانی و سید محمد مهدی حسینینین اؤلوم حکملری لغو ائدیلیب و اونلارین ایشلری یئنیدن محکمهیه گؤندریلیب.
قید ائدک کی، اردبیل ایالتینین خیاو (مشکین) شهرینین قوشا کندیندن اولان ۲۷ یاشلی میلاد آرمون ۲۰۲۲-جی ایلین سنتیابر آییندا عمومخالق اعتراض آکسییالاریندا اشتراک ائتدیینه گؤره حبس ائدیلیب.
او و باشقا ۳ گنج آرمان علیوردی آدلی حکومت مامورونون اؤلدورولمهسی اتهامینا گؤره، «محاربه»، «قصداً آدام اؤلدورمهده اشتراک» و «اجتماعی آساییشی و امین-آمانلیغی پوزماق»دا گوناهلاندیریلیب.
جاری ایلین آپرئل آییندا تهران انقلاب محکمهسینین ۱۳-جو بؤلمهسی میلاد آرمون و باشقا اوچ نفری "قصداً آدام اؤلدورمکده اشتراک" اتهامینا گؤره هر بیرینی بیر انسانین قان پولونون برابر حیصهسینی اؤدمک و بئش ایل حبس جزاسینا محکوم ائدیب.
آنجاق تهران انقلاب محکمهسینین ۱۵-جی بؤلمهسی جاری ایلین مای آیینین سونلاریندا اونون بارهسینده یئنیدن اعدام حکمو چیخاریب.
میلاد آرمون حبس ائدیلدیی واخت و اوندان سونراکی دؤورده داواملی ایشگهنجهلره معروض قالیب.
حاضردا کرجین قیزیلحصار حبسخاسیندا ساخلانیلان گونئی آذربایجانلی گنج بارهسینده ایرلی سورولن قتل اتهامینین ساختا اولدوغونو، بو ایشده علی اولمادیغینی بیلدیریب.