بو گون ۲۰-جی عصرین ان بؤیوک دهشتلریندن اولان خوجالی سویقیریمیندان ۳۳ ایل اؤتور.

Axar.az خبر وئریر کی، ۱۹۹۲-جی ایل فورالین ۲۵-دن ۲۶-نا کئچه‌ن گئجه ارمنیستان سلاح‌لی قوه‌لری ۳۶۶-جی موتوآتیجی آلایین اشتراکی ایله خوجالی شهرینی اشغال ائد‌رک، آذربایجانلیلارا قارشی سویقیریم آکتی تؤردیب.

بو دهشتلی و مثلی-برابری اولمایان قتل‌عام زمانی یوزلرله آذربایجانلی قتله یئتیریلیب، اونلارلا قادین-اوشاق مختلف ایشگنجه‌لرله اؤلدورولوب.

انسانلیق تاریخینه قارا و قانلی لکه کیمی دوشه‌ن بو سویقیریم فورالین ۲۵-ده باشلاییر. هجومدان اول، فورالین ۲۵-ی آخشام ساعتلاریندان خوجالی شهری توپلاردان و آغیر زرهلی تکنیکادان شدتلی آتشه توتولور. بئله بیر وضعیتده ارمنی سلاح‌لیلارینین محاصره‌سینده قالان اهالی یاخینلیقداکی آغدام رایونونون مرکزینه چاتماق امیدی ایله شهری ترک ائتمه‌یه مجبور اولور. لاکن اونلارین بو نیتی باش توتمور.

آزغینلاشمیش ارمنی جلادلاری شهری یئرله-یکسان ائدیر، دینج اهالیه قانلی دیوان توتور.

عمومی‌لیکده خوجالی سویقیریمی نتیجه‌سینده ۶۳-او اوشاق، ۱۰۶-سی قادین، ۷۰-ی قوجا اولماقلا ۶۱۳ نفر هلاک اولوب. ۸ عائله تمامیله محو ائدیلیب، ۲۵ اوشاق هر ایکی والدینینی، ۱۳۰ اوشاق والدینلریندن بیرینی ایتیریب. بوندان باشقا، ۴۸۷ نفر یارالانیب، ۱۲۷۵ نفر اسیر گؤتورولوب، ۱۵۰ نفر ایسه ایتکین دوشوب.

۶۸ قادین و ۲۶ اوشاغین طالعیی بوگونه‌دک معلوم دئییل.

ارمنیلر مختلف واختلاردا خوجالی سویقیریمینین مسئولیتینی اؤز اوزرلریندن آتماغا چالیشسالار دا، هر دفعه بو جهدلری فیاسکویا اوغراییب.

بئله کی، ارمنیستانین سابق پرزیدنتی و خوجالی قتل‌عامینین اشتراکچی‌سی سرژ سرکیسیان سویقیریم آکتینی مشهور انگلیس ژورنالیستی، پولیتولوق توماس دئ واآلا مصاحبه‌سینده بو سؤزلرله اعتراف ائدیب:

«خوجالییا قدر آذربایجان‌لیلار بیزیمله ساده‌جه زارافات ائتدیکلرینی دوشونوردولر. آذربایجان‌لیلار ائله بیلیردیلر کی، ارمنیلر دینج اهالیه ال قالدیرا بیلمه‌ین انسانلاردیر. بوتون بو دوشونجه‌لری دییشمک لازم ایدی. بئله ده اولدو».

بو گون کانادا، مکسیکا، کولومبیا، سودان، پرو، پاکستان، بوسنیا و هرزگوینا، رومینیا، چخیا، ایوردانیا، هوندوراس و دیگر اؤلکه‌لرین پارلامنتلری، ائلجه ده آمریکا-نین ۲۰-دن چوخ اشتاتی و اسلام امکداشلیق تشکیلاتی پارلامنت اتفاقی خوجالی فاجعه‌سینین سویقیریم آکتی کیمی تانینماسی باره‌ده قطعنامه قبول ائدیب.

۳۳ ایل اؤتمه‌سینه باخمایاراق، خوجالی سویقیریمی آذربایجان انسانین، تورک دنیاسینین اوریینده درین یارا، ارمنیستان دولتینین آلنیندا ایسه قارا لکه کیمی قالیب.