خبر وئردییمیز کیمی، مایین ۱۹-دا آذربایجان رسپوبلیکاسینین پرزیدنتی ایلهام علیئو و ایران اسلام رسپوبلیکاسینین پرزیدنتی سید ابراهیم رئیسی آذربایجان رسپوبلیکاسی ایله ایران اسلام رسپوبلیکاسینین دولت سرحدینده گؤروشوبلر.

Axar.az خبر وئریر کی، صمیمی شرایط‌ده کئچه‌ن گؤروشده دولت باشچیلاری صحبت ائتدیلر.

پرزیدنت سید ابراهیم رئیسی: سلام‌علیکم.

پرزیدنت ایلهام علیئو: علیکم‌سلام.

پرزیدنت سید ابراهیم رئیسی: سیزی گؤرمییمه ممنونام.

پرزیدنت ایلهام علیئو: من ده چوخ شادام سیزی گؤرمییمه.

پرزیدنت سید ایبراهیم رئیسی: بو چوخ گؤزل یئرده بیر-بیریمیزی گؤردوک.

پرزیدنت ایلهام علیئو: تاریخی بیر گؤروشدور. بو، چوخ گؤزل تدبیردیر و انشاالله، خیرلی اولاجاق.

پرزیدنت سید ابراهیم رئیسی: جناب ایلهام علیئو، بورادا چوخ بؤیوک بیر ایش گؤرولوب. انصافا دئملییک کی، بو، بؤلگه‌نین اهالی‌سی اوچون فایدالی بیر ایش اولاجاق. بو بندین سویوندان هم ایچمک اوچون، هم ده کند تصرفاتی ساحه‌سینده استفاده ائدیله‌جک، او جمله‌دن ۴۰ مین انسان اوچون بورادا ایش یئرلری یاراناجاق. بو سو بندینی انشا ائد‌ن مهندسلر دنیا سویه‌سینده تانینمیش مهندسلردیر. چونکی ایران دنیادا سو بندی تیکمک ساحه‌سینده ایلک دؤردلویه داخل اولان اؤلکه‌لردن بیریدیر. آراز سو بندینین انشاسیندان ۵۰ ایل سونرا بو بندین تیکیلمه‌سی اؤلکه‌لریمیز آراسیندا علاقه‌لری داها دا انکشاف ائتدیرجک. بو سو بندی بیزیم آرامیزدا چوخ گؤزل ایشلردن بیریدیر و آرزوموز بودور کی، گله‌جکده بو جور ایشلر چوخ اولسون. هر حالدا، بو گون چوخ مبارک بیر گوندور.

پرزیدنت ایلهام علیئو: من سیزینله تمامیله راضییام. بو بندین سیزین طرفدن انشاسی چوخ یوکسک پئشکارلیقلا حیاتا کئچیریلیب. عینی زماندا، آرازین ایکی ساحلینی بیرلشدیرن گؤزل بیر رمزی لایحه‌دیر. قید ائتدیینیز کیمی، سووارما، ایچمه‌لی سو تجهیزاتی اوچون، عینی زماندا، الکتریک انرژیسینین استحصالی مقصدیله گله‌جکده انشا ائدیله‌جک الکتریک استانسییالارینین فعالیتینین نتیجه‌سینده ده چوخ بؤیوک فایدالار اولاجاق و بو، بؤلگه‌لره قاییداجاق انسانلار اوچون بؤیوک بیر اوستونلوک وئرجک. من ایران طرفده گؤزل بنالاری گؤرورم، یاشاییش منطقه‌لرینی گؤرورم، انشاالله، یاخین گله‌جکده آرازین بو تاییندا دا اونا اوخشار منظره اولاجاق.

پرزیدنت سید ایبراهیم رئیسی: مطلق. بیز آذربایجانین اوغورونو، نائلیتینی اؤز نائلیتیمیز بیلیریک. بیزیم آذربایجانلا مناسبتلریمیز، باغلیلیغیمیز تکجه قونشولوق باغلی‌لیغی دئییل، آرامیزدا قلب باغلیلیغی، تاریخی بیر باغلیلیق و کؤک باغلیلیغی وار. بو، تاریخی بیر حادثه، یعنی، ایکی اؤلکه، ایکی خالق آراسیندا تاریخی بیر حادثه‌نین اساسی اولاجاق و بو، تاریخه ده حک ائدیله‌جک.

پرزیدنت ایلهام علیئو: بیز تا قدیم‌دن گلن اولو اجدادلاریمیزین آرزولارینی ایندی حیاتا کئچیریریک. امینه‌م کی، بوندان سونرا دا ایکی قارداش خالق بیر-بیری ایله سیخ تماسدا یاشایاجاق، قوراجاق، بئله گؤزل خاریقه‌لر یاراداجاق.

پرزیدنت سید ایبراهیم رئیسی: جناب پرزیدنت، من بورایا - بو بنده گلممیشدن قاباق کلاله-آغبند یولونا باخدیم. ایشلر چوخ گؤزل شکلده حیاتا کئچیریلیر. بیزیم، یعنی، آذربایجان ایله ایران آراسینداکی امکداشلیقلارین نتیجه‌لری بو سو بندی و عینی زماندا، او کؤرپو و یولدور.

پرزیدنت ایلهام علیئو: آغبند استقامتینده انشا ائدیله‌ن کؤرپو هم نوبتی نقلیات باغلانتی‌سی‌دیر، عینی زماندا، نوبتی دوستلوق رمزیدیر. بیز فاکتیکی اولاراق شمال-جنوب نقلیات دهلیزینین بیر استقامتینی ده آغبند استقامتیندن سالیریق. منه ده بو یاخینلاردا ویدئو، فوتوسندلر گؤستریلمیشدیر، گؤردوم کی، حقیقتا قیسا مدت عرضینده چوخ بؤیوک ایشلر گؤرولوب.

پرزیدنت سید ابراهیم رئیسی: من گئدیب کؤرپونون انشا اولوندوغو اراضییه باخیش کئچیردیم و اورادا گؤردوم کی، کؤرپو ایله باغلی بیر چوخ ایشلر گؤرولوب، عینی زماندا، کؤرپونون اراضی‌سینده ده تورپاق ساحه‌لرینین آیریلماسی استقامتینده ده بؤیوک اوغورلار الده ائدیلیب. حاضردا ۶ استقامتده ایشلر حیاتا کئچیریلیر. دوستلاریمیز پلان اوزره بئله پروگنوزلاشدیریرلار کی، بو لایحه‌نی ۳۶ آیا باشا چاتدیرسینلار. آنجاق من بئله گؤرورم کی، ایشلر سرعتله داوام ائدیر، یعنی، بو، تئز بیر زماندا یکونلاشاجاق.

پرزیدنت ایلهام علیئو: من قارشییا وظیفه قویموشام کی، گلن ایلین سونونا قدر بیتمه‌لیدیر و اورادا دا سیزینله برابر گؤزل بیر مراسم کئچیرریک. اوندان سونرا دمیر یولو کؤرپوسو ده یقین کی، راضیلاشدیریلاجاق.

پرزیدنت سید ابراهیم رئیسی: انشاالله. یادداقالان بیر آن اولدو. انشاالله هر ایکی دولت و خالق اوچون اوغورلو بیر ایل اولاجاق.