جلیلینین حاکمیته گلمه‌سی بؤیوک اعتراضلارا سبب اولا بیلر. چونکی خالقین بؤیوک اکثریتی اصلاحات ایستییر.

بو سؤزلری Axar.az-آ آچیقلاماسیندا گونئی‌لی ژورنالیست مسعود هارای ایراندا بو گون کئچیریله‌ن پرزیدنت سئچکیلرینین ایکینجی تورو ایله باغلی دانیشارکه‌ن دئییب.

گونئی‌لی ژورنالیست ایرانا آمریکا و آوروپا بیرلیی طرفیندن بؤیوک تضییقلر اولدوغونو خاطیرلاداراق، غرب اؤلکه‌لری ایله علاقه‌لرین نرماللاشدیریلماسینین رژیمین عمرونو اوزادا بیلجیینی بیلدیریب:

«ائله بو سبب‌دن پزشکیانین سئچیلمه‌سی منتیقلی‌دیر. پزشکیانین رقیبی سید جلیلینی روسیا و چین دستکلییر. داخلده ایسه جلیلی فارسلارین چوخلوق تشکیل ائتدیی ایران ولایتلرینده داها چوخ اؤن پلانا چیخیر. غیر-فارسلار یاشایان ولایتلرده پزشکیان لیدردیر. بونا گؤره ده جلیلینین حاکمیته گلمه‌سی بؤیوک اعتراضلارا سبب اولا بیلر. چونکی خالقین بؤیوک اکثریتی اصلاحات ایستییر».

او، پزشکیانین سئچکیلرده اشتراکینا اجازه وئریلمه‌سینی حاکمیتله خالق آراسیندا یارانان اوچورومون قارشی‌سینی آلماق و سئچیجی فعال‌لیغینی آرتیرماق اوچون آتیلان آددیم کیمی دیرلندیریر:

«پزشکیان اؤزو ده قید ائدیب کی، سئچکیلرده اشتراکینین تصدیقله‌نمه‌سی اونون اؤزونو ده تعجبلندیریب. بو، اونا اشاره‌دیر کی، بئش محافظه‌کارین یانیندا بیر اصلاحاتچینین اولماسی اونلار اوچون فایدالی‌دیر. اونون تورک اولماسی دا اساس سببلردندیر. هر نه قدر پزشکیانین «من تورکم» دئمه‌سی خامنه‌اینی قیجیقلاندیرسا دا، حاکمیت یاخشی بیلیر کی، تورکلر ایران اهالی‌سینین بؤیوک اکثریتینی تشکیل ائدیر. بو سببدن پزشکیانین سئچکیلرده اشتراکی سئچیجی فعال‌لیغینا بلاواسطه تأثیر ائدیر. اونون سئچیلمه‌سی ایسه تورکلرین حاکمیته صادقلیینه گتیریب چیخاراجاق. خامنه‌ای محض بونا گؤره پزشکیانی میدانا بوراخیب. او، هم اؤزونه مشروعیت قازاندیرماغی، هم ده رژیمین عمرونو اوزاتماغی دوشونور»، - او بیلدیریب.

قید ائدک کی، بو گون ایراندا کئچیریله‌ن پرزیدنت سئچکیلرینین ایکینجی توروندا اصلاحاتچی، آذربایجانلی مسعود پزشکیان و خامنه‌اینین تهلوکه‌سیزلیک شوراسینداکی نماینده‌سی سید جلیلی مبارزه آپاریر.