یوتوبر آلبرت ایساکوو ارمنستانین بیرینجی پرزیدنتی لئوون تر-پتروسیانین ۲۳ ایول ۱۹۹۳-جو ایلده قاراباغدا قتلعاملار تؤره‌دن و ملکی آذربایجانلیلارا قارشی آقرئسسیولیگی ایله فرق‌لنه‌ن «یرکراپا» ترورچو گروپلاشماسی قارشی‌سیندا ائتدیی چیخیشی یاییب.

Axar.az خبر وئریر کی، پتروسیانین ائتدیی چیخیشین اونو شوکا سالدیغینی بیلدیره‌ن ایساکوو ویدئونون ارمنیجه منبع‌سینی ده تقدیم ائدیب.

قید ائدک کی، آلبرت اساکووون آتاسی داغ یهودیسی (آذربایجانلی)، آناسی ارمنی‌دیر. ۱۹۷۴-جو ایل تولدلو ایساکوو باکی‌دا دوغولوب و ۱۶ یاشینا قدر آذربایجان‌دا یاشاییب، ۱۹۹۰-جی ایلده ارمنستانا کؤچوب و ۱۲ ایل ده اورادا قالیب: سونرا ۵ ایللیک اسرائیل حیاتی باشلاییب، حاضردا کانادادا یاشاییر.

ایساکووون فکرینجه، بو متن ارمنیلرین «ملی استراتگییاسی و هدفلرینی» آنلاماق، بو جنایتکار دسته‌نین هانسی «آماللار» اوغروندا یاشاماسینی باشا دوشمک باخیمین‌دان اؤنم‌لیدیر:

«پتروسیان بو جینایتکار دسته‌یه «قارداشلاریم» دئیه مراجعت ائدیر و قطیعا اؤز حرکاتینین مقصدینی گیزلتمیر. بو چیخیشیندا او اؤز فاشیست ماهیتینی و فاشیست مقصدلرینی اورتایا قویور».

پتروسیان ۱۹۸۸-جی ایلده‌ن آذربایجان‌لیلارا قارشی سلاحلی حرکاتا باشلادیقلارینی و قتلعاملار حیاتا کئچیردیکلرینی اعتراف ائدیر، بیلدیریر کی، ۵ ایل اول (چیخیش ۱۹۹۳-جو ایلده ائدیلیب) بیز بو حرکاتا باشلاماسایدیق، عمومیتله قاراباغ مسئله‌سی اولمایاجاقدی.

پتروسیان دئییر کی، بیز ۳ مسئله‌نی حل ائتدیک: ۱. ۶۰۰ ایلدیر ارمنی خالقینین باجارمادیغینی حیاتا کئچیردیک - بوتون ارمنستانی و قاراباغی دیگر ملتلردن تمامیله تمیزلدیک. بونون نتیجه‌لرینی ارمنی خالقی بوندان سونرا ۶۰۰ ایل حس ائد‌جکلر.

پتروسیان ۱۹۸۸-جی ایله قدر ارمنستان‌دا ۱۷۰ مین آذربایجانلینین اولدوغونو خاطرلاداراق بیلدیریر کی، تصور ائدین، ایندی اونلار ارمنستان‌دادیر:

«اگر اونلار ارمنستان‌دا اولسایدی، بیزیم دولتیمیز اولمایاجاقدی؛ بیز اوندا شمال-شرق رایونلارینی، گؤیچه‌نی مدافعه ائده بیلمه‌یه‌جه‌کدیک.آذربایجان‌لیلار ۳ رایوندا چوخلوق تشکیل ائدیردیلر: بو، واردنیس (باسارکئچر)، ماسیس (زنگیباسار) و آماسیادیر. آذربایجان‌لیلار زنگزور محالیندا بؤیوک اوستونلوک تشکیل ائدیردیلر. بو پروبلم حل ائدیلدی و بو، گؤیدن هدیه کیمی دوشمه‌دی. بونو بیز ائتدیک – ملی حرکات ائتدی، ارمنی عموم میلی حرکاتی و اونون حربی قانادی، اؤزونومدافیه باتالیونلاری، بیزیم «یرکراپا» دسته‌سی. همچینین قاراباغ. بو گون بوتون آرتساخ، او جمله‌دن داها بیر چوخ تورپاقلار ارمنیلرین الینده‌دیر».

ایساکوو بیلدیریر کی، پتروسیان فاکتیکی اولاراق آذربایجان‌لیلارین سلاح گوجونه قووولماسینی تصدیقله‌ییب:

«پتروسیان بیلدیریر کی، ۳ رایوندا، او جمله‌دن زنگزوردا آذربایجان‌لیلارین چوخلوق تشکیل ائتمه‌سی ارمنستان اوچون تهدید ایدی و ائتنیک تمیزله‌مه‌ده سلاحلی بیرلیکلرین رول اوینادیغینی اعتراف ائدیر. پتروسیان «ارمنستان تمیزلندی» دئییر. زیبیلدن، چیرکدن تمیزله‌نمک اولا بیلر. پتروسیان ایسه بورادا جانلی اینسانلاری، اؤز یوردوندا کمپاکت یاشایان آذربایجانلیلاری نظرده توتور. بو، ناسیزم و گیزلدیلمه‌یه‌ن فاشیزم‌دیر.

بو گون همین بو خالق هانسی‌سا «ائتنیک تمیزله‌مه‌دن» دانیشیر».

پتروسیان داوام ائدیر و ایکینجی اوغور کیمی آذربایجان‌دان ۵۰۰ مین ارمنینین کؤچورولمه‌سینی گؤستریر. او بیلدیریر کی، اگر اونلار آذربایجان‌دا قالسایدی، ارمنستانا تضییق واسطه‌سینه چئوریله‌جکدیلر. اونون فکرینجه، ۳۰۰ مین ارمنی ارمنستانا گلدی کی، بو دا دموگرافیک پروبلمی حل ائتدی.

پتروسیان ۳-جو اوغور کیمی سیاسی و حربی فعالیتی بیرلشدیردیکلرینی، حربی باخیم‌دان ایده‌آل ایش گؤردوکلرینی وورغولاییر.