ایران پرزیدنتی مسعود پزشکیانین خوزستان ایالتینه سفری زمانی ایالت مرکزی اهوازدا ایش آداملاری و استحصال‌چیلارلا گؤروشونده آذربایجان آتالار سؤزو ایشلتمه‌سی داخیلده و خاریج‌ده فعالیت گؤستره‌ن بیر سیرا فارس دیللی مئدیا اورگانلاریندا و سوسیال شبکه‌ده گئنیش یاییلیب.

ایران‌لی سوسیال مئدیا استفاده‌چیلری «اوغول شعورلو اولسا نه ائدر آتا مالینی، شعورسوز اولسا نه ائدر آتا مالینی» مثالینی مختلف فورمالاردا یوزوب، بونا جوابلار یازیبلار.

اونلارین بیر چوخونون فکرینجه، پرزیدنتین بو ایفاده‌سی هم ده خوزستان‌لیلارا مرکزدن نسه اومماماقلاری باره‌ده مئساژدیر.

پزشکیانین تورک دیلینده آتالار سؤزو ایشلتمه‌سی ایسه بعضیلرینین سئوینجینه سبب اولوب، اونلاری یئنی‌دن ایران‌دا تورک دیلینه هانسی‌سا ایستاتوسون وئریلجیینه اومیدلندیریب. آنجاق ایران پرزیدنتینین سئچکی قاباغی دئدیکلری ایله سئچیلدیکدن سونرا کئچن مدت عرضینده‌کی فعالیتلری بو اومیدلرین حیاتا کئچیریلجیینه اینامی آزالدیر. اونا گؤره کی، همین مدت عرضینده مسعود پزشکیان فارس دیلی و مدنیتینین انکشافی، فارس دیلی آکادمییاسینین بودجه‌سینین آرتیریلماسی ایله باغلی ایر‌لی سورولن تکلیفلرله راضیلاشیب، بیر نئچه قرار قبول ائدیب.

اونون فعالیته باشلاماسیندان سونرا تاجیک فارس مدنیتی تدقیقات مرکزی یارادیلیب، پزشکیانین تاجکستانا سفری زمانی ایسه همین مرکزین دوشنبه‌ده‌کی اوفیسینین آچیلیشی اولوب.

بونونلا یاناشی، فارس میلیت‌چی‌لییی و آذربایجان‌لیلارا قارشی منفی مناسیبتی ایله تانینان فارس دیلی آکادمییاسینین باشچی‌سی حداد عادلین باش‌چی‌لیق ائتدیی قورومون گئنیش‌لندیریلمه‌سی تکلیفینه ده مثبت جواب وئریب.

بو مدت عرضینده فارس دیلی و مدنیتینین انکشافی ایله باغلی بیر نئچه قرار امضالایان و تکلیفلرین رئاللاشماسینا مثبت جواب وئره‌ن مسعود پزشکیانین تورک دیلی ایله باغلی آددیمی یالنیز بیر نئچه دفعه آذربایجان آتالار سؤزو ایشلتمکدن عبارت اولوب.

ایران پرزیدنتینین آتالار سؤزونه استنادلاری ایران رهبری علی خامنه‌اینین ده آرادا-بیر تورک سؤزلری ایشلتمه‌سی، آذربایجان دیلینده شعر اوخوماسینی، آنجاق بو دیلین رسمی ایستاتوسو ایله باغلی هئچ بیر آددیم آتیلمادیغینی خاطرلادیر.

بئله چیخیر کی، پزئکیان دا تورک دیلینی آذربایجان آتالار سؤزو سوییه‌سیندن یوخاری قالدیرماق گوجونده و یا ماراغیندا دئییل.

او، ملت وکیل‌لییی دؤورونده غیری-فارس دیللرده تحصیل و مئدیا نشرینی نظرده توتان کونستیتوسییانین ۱۵-جی ماده‌سینی بیر نئچه دفعه خاطرلاتسا دا، پرزیدنت سئچیلدیکدن سونرا بو باره‌ده جدی چیخیش ائتمه‌ییب، طلب ایر‌لی سورمه‌ییب. خصوصاً پزشکیانین یئنی تحصیل ایلینین باشلانماسی ایله باغلی چیخیشی زمانی غیری-فارس دیللرله باغلی هئچ نه دئمه‌مه‌سی اونا سس وئره‌ن عیری-فارسلارین قیناغی ایله اوزلشیب.

بو، هم ده اونا گؤره باش وئریر کی، مسعود پزشکیانین اختیاری اؤز الین‌ده دئییل و او، اوزون ایللردیر حاکم اولان، گیزلی فارس میللتچی‌لییی اساسین‌دا قورولان سیستمین اوزده اولان اجراچیلاریندان بیریدیر.

ایران پرزیدنتینین دفعه‌لرله عرب و کورد دیللرینده ده دانیشیب، چیخیش ائتدیینی نظره آلساق، اونون آذربایجان آتالار سؤزلرینه مراجعت ائتمه‌سینین تورک دیلینین ایستاتوسو ایله باغلی اولمادیغی، بونون مختلف خالقلارین نماینده‌لرینین باشینا «شیره چکمک» نیتی داشیدیغینی دا دئمک اولار.

آنجاق گؤرونه‌ن اودور کی، آذربایجان‌لیلار، خصوصاً ایران‌داکی حاکم سیستمین قورونوب ساخلانیلماسی اوچون سئچکیلره بوراخیلان مسعود پزشکیانا سس وئره‌نلر باشلارینین شیره‌له‌نمه‌سینه، آلدادیلماغا داها میل‌لیدیرلر.