آمریکانین یئنی پرزیدنتی دونالد ترامپین ایرانا قارشی حربی‌ هجوم باره‌ده کونکرت فکر بیلدیرمه‌مه‌سی و ایرانین تصور اولونان قدر ضعیف اولمادیغینی دئمه‌سی ایران رهبرلیینین محافظه‌کار عضولرینین سئوینجینه سبب اولوب.

آنجاق ترامپین ایرانا قارشی ماکزیموم تضییق باره‌ده فرمان امضالاماسی، فرمان‌دا قید اولونان بندلر تهران حاکمیتینین سئوینجینین اساس‌سیز اولدوغونو، سیاسی و اقتصادی تضییقلرین حربی هجومدان داها تهلوکه‌لی و سارسیدیجی اولاجاغینا دلالت ائدیر.

بونون فرقین‌ده اولان مسعود پزشکیان کومانداسی، مختلف واسطه‌لرله، حتی معلملر، طب ایشچیلری، ضیالیلار و باشقا طبقه‌لرین تهران-واشینگتن آراسین‌دا دانیشیقلارین باشلاماسی ایله باغلی مراجعتلرینی یایاراق، اؤلکه‌نی گؤزله‌یه‌ن داها درین فلاکت‌دن چیخارماق اوچون آمریکا ایله دانیشیقلارا زمین یاراتماق ایستییر.

۸ ایل اول ترامپین ایلک پرزیدنت‌لییی دورونده ده واشینگتن تهرانا قارشی اوخشار سیاست حیاتا کئچیرمیشدی و بو ایران‌دا اقتصادی و سیاسی بحرانین درینلشمه‌سی ایله نتیجه‌لنمیشدی.

جو بایدن دورونده ترامپین سانکسییالاری گؤتورولمه‌سه ده، اونلارین تطبیق ائدیلمه‌سینده‌کی سهل‌انکارلیق تضییقین اینتنسیولیینین آزالماسینا سبب اولدوغو اوچون ایرانی نووه پروگرامین‌دان بیر دفعه‌لیک امتنا ائتمه‌یه مجبور ائتمک ممکن اولمادی.

آنجاق ایندی گؤرونه‌ن اودور کی، یئنی‌دن حاکمیتی اله آلان دونالد ترامپ، پرزیدنتلیینین ایلک دورون‌ده باشلادیغی سیاستلری حیاتا کئچیرمکده اسرارلی‌دیر.

ترامپ چئویک تجارت بینینه صاحب اولدوغونا گؤره، ایران حاکمیتینین ایدئولوژی تمللر اوزرینده قورولان سیستمین موجودلوغونو قورویوب ساخلاماق اوچون خالقین منافعینه ضد اولسا دا ایسته‌نیله‌ن گذشته گئدجیینی یاخشی بیلیر.

بو سبب‌دن ده، اونون ایرانا حربی هجوم باره‌ده دئییل، هله‌لیک تهرانا سیاسی و اقتصادی تضییقلر گؤستره‌رک ماکزیموم امتیازلار آلماق باره‌ده دوشوندویو حس اولونور.

آمریکا پرزیدنتی بیلیر کی، ایران اقتصادیاتی سانکسییالارین تضییقی آلتیندا چؤکوب، اینفلیاسییا و ایشسیزلیک سیستمه داخلی تضییقلری گوجلندیریب، اونا گؤره ده ایران تعجیلی اولاراق اقتصادی محدودیتلری آزالتماغا مجبور اولاجاق.

بونا گؤره ده دونالد ترامپ تهرانا قارشی ایر‌لی سوردویو شرط و طلبلرینین سوییه‌سینی قالدیریر، ایران‌دا سیاسی و اقتصادی وضعیتین پیسلشمه‌سین‌دن استفاده ائد‌رک، تئران قارشی‌سین‌دا داها سرت شرطلر قویور.

او، بیر یاندان آمریکانین نفت حاصیلاتینی آرتیرماقلا، باشقا طرف‌دن ایسه ایران کؤرفزین‌ده‌کی رگیونال متفیقلری ایله کوردیناسییالی شکیل‌ده حرکت ئده‌رک، تهرانین آسیلی اولدوغو نفتین قیمتینی آشاغی سالماغا، بونونلادا ایران اقتصادیاتینا داها آغیر ضربه وورماغا چالیشیر.

نظره آلساق کی، ایران اقتصادیاتی اساساً غیری-رسمی کاناللار واسطه‌سیله آشاغی قیمته نفت اخراجینا آرخالانیر، بین‌الخالق قیمتلرین آشاغی دوشمه‌سی، تهرانی نفتینی داها دا آشاغی قیمته ساتماغا مجبور ائد‌جک، بو ایسه اونسوزدا آغیر وضعیت‌ده اولان ایران اقتصادیاتین‌داکی بحرانی و بو اؤلکه‌نین بین‌الخالق تجریدینی گوجلندیره‌جک.

بوتون بونلارا گؤره ده، مسعود پزشکیان و اونون کومانداسی آمریکا ایله دانیشیقلارین اهمیتینی وورغولاییر، بونون باش توتماسی اوچون علی خامنه‌ای و اونا تابع محافظه‌کار سیاسی جریانی دانیشیقلارا راضی سالماغا چالیشیر.

پزشکیان یاخشی بیلیر کی، دانیشیقلارین باش توتماماسی، ایرانین اوولکی مؤقعین‌ده اسرار ائتمه‌سی تقدیرده، ترامپین اسرائیلین ایرانین نووه تاسیساتلاری و حربی مرکزلرینه ضربه ائندیرمه‌سینه اجازه وئرجیی ممکن‌دور.

بو، ترامپین بیرینجی دور پرزیدنت‌لییی واختیندا دا تجروبه ائدیلیب و او، ایرانین مؤقعین‌ده دییشیک‌لیک ائتمه‌مه‌سینه گؤره، "بیرگه هرطرفی فعالیت پلانی" دانیشیقلارین‌دان چیخیب، سپاه-ین قدس قوه‌لرینین کوماندیری قاسم سلیمانینین آرادان گؤتورولمه‌سینه گؤستریش وئریب.

بوتون بونلارا گوره ده، تهران قارشی‌داکی بیر نئچه آی عرضین‌ده سئچیم ائتمه‌لی، یا دانیشیقلارا راضیلاشمالی، یا دا داها آغیر و فلاکت‌لی وضعیتله اوزلشمیی قبول ائتمه‌لیدیر.

ایکینجی واریانتین سئچیلمه‌سی تقدیرده ایسه، اقتصادی باخیم‌دان داهادا گوجسوزلشن، یئنی بحرانلارلا اوزلشن آیت الله‌لار رژیمینین یئنی داخلی اعتراض دالغاسی ایله اوزلشجه‌یی، حاکمیت دییشیکلیینین بو واسطه ایله باش وئرجیی قاچیلمازدیر.

بئله اولان حال‌دا، سپاه-ین اوزاق منزیل‌لی راکتلری خامنه‌ای‌نی خلاص ائده بیلمه‌یه‌جک!