تورکمنیستان گله‌جکده آذربایجان اوزریندن آوروپایا دا گاز نقل ائده بیلر.

بو سؤزلری Axar.az-آ آچیقلاماسین‌دا اقتصادچی اکسپرت ناطیق جعفرلی تورکمنیستان گازینین آذربایجان اوزریندن تورکیه‌یه نقل اولونماسی باره‌ده دانیشارکه‌ن دئییب.

اکسپرت بیلدیریب کی، بو لاییحه ایللر اؤنجه‌دن مذاکره اولونوردو:

«آذربایجان اوزریندن تورکمنیستان گازینین نقل اولونماسینین ان یاخشی یولو بیرباشا ترانس-خزر بورو کمرینین چکیلمه‌سی اولمالی ایدی. باخمایاراق کی، آوروپا بیرلیی ده لاییحه‌یه بؤیوک یاتیریم آییرماغی دوشونوردو. آنجاق ایران و روسیا اوزون مدت بو بورو کمرینین چکیلمه‌سینه مانع‌چیلیکلر تؤردیردیلر و بو لاییحه‌نی ده رئاللاشدیرماق ممکون اولموردو.

آنجاق ایندی سخئم بیر آز فرقلی‌دیر. چونکی حاضردا تورکمنیستان، آذربایجان و ایران آراسین‌دا سوپ آنلاشماسی امضالانیب. تورکمنیستان اؤز گازینی ایرانلا سرحددینده ایرانا وئریر. آنلاشمایا گؤره ده آذربایجان عینی حجم‌ده گازی ایران اوزریندن آلیر، باکی-تفلیس-ارزوروم گاز کمری، تاناپ واسطه‌سی ایله تورکیه‌یه اؤتوره بیلیر.

طبیعی کی، بو، آذربایجانا ترانزیت گلیرلر باخیمیندان اوغورلو مقاوله‌دیر. او جمله‌دن، گله‌جکده سوپ آنلاشمانین حجمی گئنیشلنرسه، آوروپا استقامتینه‌ده ده تورکمنیستان گازینین نقل اولونماسی ممکون اولا بیلر».

قید ائدک کی، ۲۰۲۵-جی ایل مارتین ۱-دن اعتباراً تورکمنیستان گازی آذربایجان اوزریندن تورکیه‌یه نقل اولوناجاق.